ព្រះសីហនុ ៖ ទំនិញឆ្លងកាត់កំពង់ផែស្វយ័តក្រុងព្រះសីហនុ ក្នុងរយៈពេល៤ខែ ឆ្នាំ២០២១ សរុបមានចំនួនបរិមាណជាង២លានតោន កើនឡើងជាង ៩ភាគរយ ក្នុងនោះ ការប្រមូលចំណូលលើអាជីវកម្មសរុបចំនួនទឹកប្រាក់ជាង ២៨ពាន់លានដុល្លារ កើនឡើងជាង ៩ភាគរយ បើធៀបរយៈពេលដូចគ្នាឆ្នាំ២០២០ ។
តាមរបាយការណ៍បូកសរុបលទ្ធផលការងារ រយៈពេល ៤ខែ ឆ្នាំ ២០២១ របស់កំពង់ផែស្វយ័តក្រុងព្រះសីហនុ បានបង្ហាញឲ្យដឹងថា ការនាំចូលមានចំនួន ១,៨ លានតោន កើនឡើងជាង ១១ ភាគរយ និងការនាំចេញមានបរិមាណជាង ៥៤ម៉ឺនតោន កើនឡើងជាង ៤ភាគរយ បើធៀបរយៈពេលដូចគ្នាទៅនឹងឆ្នាំ ២០២០ ។
ការនាំចូលទំនិញសំខាន់ៗតាមកុងតឺន័រ រួមមាន៖ ម៉ូតូ, ក្រណាត់, បារី, និងទំនិញផ្សេងៗមានការកើនឡើង ខណៈការដឹកជញ្ជូនរួមមាន ៖ រថយន្ត, គ្រឿងចក្រ, កង់ និងសំលៀកបំពាក់ បានថយចុះ ។ ចំពោះការដឹកជញ្ជូនមិនមែនកុងតឺន័រមានដូចជា គ្រឿងចក្រ និងលោហៈធាតុ មានបរិមាណកើនឡើង ខណៈការដឹកជញ្ជូនប្រេង និងសម្ភារៈផ្សេងៗបានធ្លាក់ចុះ ។ ដោយឡែកការនាំចេញសម្រាប់ទំនិញសំខាន់ៗវិញរួមមាន ៖ ក្រណាត់, ស្បែកជើងនិងស្រោមជើង រួមជាមួយការនាំចេញសម្ភារៈផ្សេងៗទៀត មានបរិមាណកើនឡើង, ចំណែកការនាំអង្ករ, សំលៀកបំពាក់, គឿងចក្រ, ឈើកែច្នៃ និងបារី មានចំនួនបរិមាណធ្លាក់ចុះ ។
កំពង់ផែស្វយ័តក្រុងព្រះសីហនុ អនុវត្តន៍ចំណូលលើការធ្វើអាជីវកម្មសរុបមានចំនួនជាង ២៨ លានដុល្លារ កើនឡើងប្រមាណជាង ៤ ភាគរយ បើធៀបទៅនឹងរយៈពេលដូចគ្នាក្នុងឆ្នាំ ២០២០ ក្នុងនោះចំពោះចំណូលលើករៀបទុកដាក់ ប្រមូលបានជាង ១៨ លានដុល្លារ, ចំណូលចលនានាវា ជាង ៥ លានដុល្លារ, ចំណូលស្តុកឃ្លាំងជាង ១លានដុល្លារ, ចំណូលដឹកជញ្ជូនជាង ១ម៉ឺនដុល្លារ និងអាករលើតម្លៃបន្ថែម ១០% អនុវត្តន៍បានជាង ២ លានដុល្លារអាមេរិកផងដែរ ៕
អត្ថបទ ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
