ព្រឹត្តិការណ៍កីឡាអាស៊ី(Asian Games) លើកទី១៩ នៅទីក្រុង Hangzhou ប្រទេសចិន ដែល​លើក​ពី​ឆ្នាំ២០២២ មករៀបចំនៅឆ្នាំ២០២៣ នឹងប្រារព្ធពិធីបើកការប្រកួតផ្លូវការ នាល្ងាច​ថ្ងៃទី​២៣ ខែ​កញ្ញា​ស្អែក ខណៈរដ្ឋាភិបាលចិន បានយាងព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ស្តេច​យាងចូលរួមជាភ្ញៀវកិត្តិយសពិសេសរបស់ម្ចាស់ផ្ទះ ក្នុងពិធីបើកកីឡាប្រចាំទ្វីបអាស៊ី ៤ឆ្នាំម្ដងនេះ ។

ឯកឧត្តម វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និង​ជា​អគ្គលេខាធិការ​គណៈកម្មាធិការ​ជាតិអូឡាំពិកកម្ពុជា(NOCC) បានចាត់ទុកនេះគឺជាមហាកិត្តិយសមួយ សម្រាប់​កម្ពុជា​ ពិសេសដែលមានព្រះរាជវត្ដមានរបស់ព្រះមហាក្សត្រនៃព្រះរាជាណាចក្រកម្ពុជា នឹង​ស្ដេច​យាង​ចូលរួមពិធីបើកកីឡាអាស៊ី ដែលជាការទូតដ៏ល្អបរិសុទ្ធមួយភ្ជាប់នឹងកីឡា ហើយ​ក៏​ជា​ការ​ផ្ដល់នូ​វ​កិត្តិយស និងការលើកទឹកចិត្តដល់វិសេសវិសាលបំផុតដល់ប្រតិភូកីឡាកម្ពុជា ដែល​ត្រូវ​បំពេញ​បេសកកម្មក្នុងព្រឹត្តិការណ៍នេះ ។

គួរដឹងថា សម្រាប់ការប្រកួតកីឡាអាស៊ី លើកទី១៩ នៅទីក្រុង ​Hangzhou ​នឹង​ដំណើរ​ការ​ប្រកួត​ផ្លូវការ ​ពី​ថ្ងៃទី២៣ ខែកញ្ញា ដល់ថ្ងៃទី០៨ ខែតុលា ឆ្នាំ២០២៣ ដោយកម្ពុជាបានបញ្ជូនអត្តពលិក ១​៧ប្រភេទកីឡាចូលរួមប្រកួត រួមមាន​កីឡា​អត្តពលកម្ម,​ ហែលទឹក, ​បាល់ទះ, ​បាល់បោះ, ​ជឺជីតស៊ូ,​ តេក្វាន់ដូ WT,​ គ្រិកឃីត, ​យូដូ, ចំបាប់, វាយសី, ការ៉ាតេ, ទូកក្ដោង, ទ្រីយ៉ាត្លុង, ​ទូក​ប្រពៃណី, ​សូហ្វតិន្នីស, អុកចិន និងកីឡាគុនដាវ ។ ក្នុងចំណោមអត្តពលិកទាំងអស់ មាន​កីឡា​សក្ដានុពលប្រមាណ ៦-៧ប្រភេទកីឡា ដែលកម្ពុជារំពឹងទទួលបានមេដាយ ។ នេះបើ​តាម​ការបញ្ជាក់​បន្ថែមរបស់ឯកឧត្តម វ៉ាត់ ចំរើន ៕ អត្ថបទ លី ឈុនឡា