អាមេរិក ៖ សហរដ្ឋអាមេរិកកាលពីថ្ងៃព្រហស្បតិ៍ បានប្រកាសផ្តល់ជំនួយមនុស្សធម៌ជាង ១១៦ លានដុល្លារសម្រាប់សហភាពមីយ៉ាន់ម៉ា បង់ក្លាដែស និងតំបន់ជុំវិញនោះ ខណៈដែលរដ្ឋបាលលោកបៃដិន ស្វះស្វែងរកការគាំទ្រដល់ជនភៀសខ្លួនរ៉ូហ៊ីងយ៉ារាប់សែននាក់។

ក្រសួងការបរទេស បានប្រកាសពីការប្តេជ្ញាចិត្តនៅក្នុងសេចក្តីថ្លែងការណ៍មួយ ដោយនិយាយថា ខ្លួនលើកឡើងពីជំនួយសរុបរបស់សហរដ្ឋអាមេរិកសម្រាប់អ្នកដែលរងផលប៉ះពាល់ដោយវិបត្តិជនភៀសខ្លួនរ៉ូហ៊ីងយ៉ាដល់ ២.២ពាន់លានដុល្លារ ចាប់តាំងពីខែសីហាឆ្នាំ២០២១ ជាពេលដែលសមាជិកជាង៧៤២.០០០ នាក់នៃប្រជាជនភាគតិច ត្រូវបានបង្ខំឲ្យភៀសខ្លួនអំពើហិង្សាទ្រង់ទ្រាយធំ ដែលបានផ្ទុះឡើងប្រឆាំងនឹងពួកគេនៅមីយ៉ាន់ម៉ា ទៅប្រទេសបង់ក្លាដែស ។

យោងតាមឧត្តមស្នងការទទួលបន្ទុកជនភៀសខ្លួនរបស់UN ពាក់កណ្តាលនៃអ្នកដែលភៀសខ្លួនចេញពីប្រទេសនេះ គឺជាកុមារ ហើយអំពើហិង្សាដែលពួកគេត្រូវបានទទួលរងផលប៉ះពាល់នោះ នៅក្នុងប្រទេសមីយ៉ាន់ម៉ារួមមានការដុតបំផ្លាញភូមិទាំងមូល និងការសម្លាប់មនុស្សរាប់ពាន់គ្រួសារ ព្រមទាំងការរំលោភសិទ្ធិមនុស្សផ្សេងទៀត។

ការិយាល័យជនភៀសខ្លួនរបស់UN បាននិយាយថា ជនជាតិរ៉ូហ៊ីងយ៉ាជាងមួយលាននាក់ បានភៀសខ្លួនចេញពីប្រទេសមីយ៉ាន់ម៉ា ចាប់តាំងពីទសវត្សរ៍ឆ្នាំ ១៩៩០ ដែលក្នុងនោះជាង ៩៦០.០០០ នាក់ រស់នៅក្នុងប្រទេសបង់ក្លាដែស។