ចិន ៖ នៅថ្ងៃសុក្រ (២២ កញ្ញា) នេះ ហាងលក់ទូរស័ព្ទ Apple Store ដ៏ល្បីរបស់ទីក្រុងសៀងហៃ ប្រទេសចិន បានទាក់ទាញមនុស្សតម្រង់ជួរយ៉ាងយូរ មកទទួលយកការបញ្ជាទិញទូរស័ព្ទ iPhone 15 របស់ពួកគេ ប៉ុន្តែអ្នកខ្លះមិនចាប់អារម្មណ៍ខ្លាំងចំពោះទូរស័ព្ទម៉ូដែលថ្មីនេះនោះទេ។ 

ប្រព័ន្ធផ្សព្វផ្សាយក្នុងស្រុករបស់ប្រទេសចិនបានរាយការណ៍ថា ម៉ូដែលទូរស័ព្ទ iPhone 15 Pro និងម៉ូដែល Pro Max ស៊េរីខ្ពស់ ត្រូវបានលក់អស់នៅក្នុងហាងលក់ទូរស័ព្ទ Apple Store នៅលើទីផ្សារអនឡាញរបស់ក្រុមហ៊ុន អាលីបាបា ក្នុងរយៈពេលត្រឹមតែមួយនាទីនៃការដាក់លក់ប៉ុណ្ណោះ។

ទោះបីជាមានសន្ទុះនៃការលក់ខ្លាំងក្លាក៏ដោយ ក៏អតិថិជនជាច្រើនមិនបានចាប់អារម្មណ៍នឹងមុខងាររបស់ទូរស័ព្ទសេរីថ្មីនេះទេ។ 

លោក Wang Puyu ដែលជាអតិថិជនម្នាក់បាននិយាយថា លោកបានធ្វើការប្ដូរសេរីទូរស័ព្ទ iPhone របស់ខ្លួនជារៀងរាល់ឆ្នាំ អស់រយៈពេល១០ឆ្នាំមកហើយ ហើយស្រដៀងគ្នានេះដែរគឺនៅថ្ងៃសុក្រនេះ លោកក៏បានចូលរួមតម្រង់ជួរនៅហាងទូរស័ព្ទ Apple Store ដើម្បីចាំយកទូរស័ព្ទសេរីថ្មី ដែលលោកបានបញ្ជាទិញផងដែរ ប៉ុន្តែលោកនិយាយថា ខ្លួនអាចនឹងឈប់ប្ដូរសេរីទូរស័ព្ទ iPhone នៅឆ្នាំក្រោយនេះហើយ ដោយសារតែវាពុំមានអ្វីថ្មីក្នុងការទាក់ទាញលោកទៀតនោះទេ។

ការចេញលក់ទូរស័ព្ទ iPhone 15 របស់ក្រុមហ៊ុន Apple បានទាក់ទាញប្រតិកម្មផ្សេងគ្នានៅក្នុងប្រទេសចិន ដោយមនុស្សជាច្រើនបានប្រៀបធៀបទូរស័ព្ទ iPhone ថ្មីនេះទៅនឹងទូរស័ព្ទ Huawei Mate 60 Pro ដែលត្រូវបានសាទរដោយប្រព័ន្ធផ្សព្វផ្សាយរដ្ឋថា ជាជ័យជំនះរបស់ប្រទេសចិនជុំវិញការដាក់ទណ្ឌកម្មរបស់សហរដ្ឋអាមេរិក៕