បារាំង ៖ ទីស្មសានសម័យសង្រ្គាមលោកលើកទី ១នៅក្នុងប្រទេសបារាំង និងប្រទេសបែលហ្ស៊ិក ភ្នំប្រល័យពូជសាសន៍ឆ្នាំ ១៩៩៤ របស់ប្រទេសរ៉្វាន់ដា ហើយនិងអតីតមន្ទីរធ្វើទារុណកម្មនៅក្នុងប្រទេសអាហ្សង់ទីន ត្រូវបានប្រកាសជាសម្បត្តិបេតិកភណ្ឌពិភពលោករបស់អង្គការ UNESCO ពេលដែលទីភ្នាក់ងាររបស់អង្គការសហប្រជាជាតិ(UN) មួយនេះ បញ្ចប់ការផ្អាកបញ្ចូលទីតាំងរំឭកអនុស្សាវរីយ៍ដល់ការរងគ្រោះរបស់មនុស្ស ។ 

ទីតាំងសល់ពីសម័យសង្រ្គាមលោកលើកទី ១ទាំងនេះ ហ៊ុព័ទ្ធដោយទីស្មសានយោធាជាច្រើន កន្លែងបញ្ចុះសពលើសមរភូមិ និងទីតាំងរំឭកអនុស្សាវរីយ៍រវាងតំបន់ភាគខាងជើងបែលហ្ស៊ិក និងតំបន់ភាគខាងកើតប្រទេសបារាំង ។ 

 ទីតាំង ១៣៩កន្លែង រៀបរាប់ពីខ្សែត្រៀមមុខអំឡុងសម័យសង្រ្គាមលោកលើកទី ១ ហើយនិងមានរុក្សាទុកឥដ្ឋិធាតុរបស់ទាហានរាប់ម៉ឺននាក់ ដែលមានសញ្ជាតិជាច្រើនផ្សេងៗគ្នា ។ 

 មកទល់នឹងពេលនេះ បន្ទាយឃុំឃាំងមនុស្ស Auschwitz-Birkenau ស្ថិតក្នុងប្រទេសប៉ូឡូញ និងវិមានរំឭកអនុស្សាវរីយ៍សន្តិភាពហ៊ីរ៉ូស៊ីម៉ា ស្ថិតនៅក្នុងប្រទេសជប៉ុន បានក្លាយជាទីតាំងរំឭកអនុស្សាវរីយ៍ ២កន្លែងគត់ នៅលើបញ្ជីសម្បត្តិបេតិកភណ្ឌពិភពលោកដែលឃ្លាំមើលយ៉ាងដិតដល់របស់ទីភ្នាក់ងារវប្បធម៌របស់ UNមួយនេះ ។ 

 នៅក្នុងជំនួបរបស់គណៈកម្មាធិការសម្បត្តិបេតិកភណ្ឌពិភពលោកអង្គការ UNESCO ស្ថិតនៅទីក្រុងរីយ៉ាដ ប្រទេសអារ៉ាប៊ីសាអូឌីត កាលពីថ្ងៃពុធ រដ្ឋជាសមាជិកអង្គការ UNESCO បានយល់ព្រមបញ្ចូលទីស្មសានក្នុងសម័យសង្រ្គាមលោកលើកទី ១ និងទីតាំងប្រល័យពូជសាសន៍ឆ្នាំ ១៩៩៤របស់ប្រទេសរ៉្វាន់ដា ទៅក្នុងបញ្ជី ក្រោយពីបញ្ចូលមន្ទីរធ្វើទារុណកម្មអាហ្សង់ទីន កាលពីថ្ងៃអង្គារ ៕