មេដឹកនាំកូរ៉េខាងជើង លោក គីម ជុងអ៊ុន បានបញ្ជាឲ្យមាននូវវិធានការមិនជាក់លាក់ ដើម្បីធ្វើឲ្យរីកចម្រើនដល់ទំនាក់ទំនងជាមួយប្រទេសរុស្ស៊ីបន្ថែមទៀត បន្ទាប់ពីមាននូវដំណើរទស្សនកិច្ច នាពេលថ្មីៗនេះ ទៅកាន់ប្រទេសនេះ ខណៈដែលសហរដ្ឋអាមេរិក និងកូរ៉េខាងត្បូងព្រមានថា កិច្ចសហប្រតិបត្តិការលើអាវុធយោធា នឹងមានគ្រោះថ្នាក់ និងនាំមកនូវផលវិបាកជាមិនខាន។

យោងតាមទីភ្នាក់ងារសារព័ត៌មានមជ្ឃិមកូរ៉េផ្លូវការ KCNA បានឲ្យដឹង នៅថ្ងៃសុក្រ (ទី២២ ខែកញ្ញា) នេះ ថា អំឡុងកិច្ចប្រជុំគណៈកម្មាធិការមជ្ឈិមបក្ស កាលពីថ្ងៃពុធ (ទី២០ ខែកញ្ញា) លោក គីម បានរៀបចំឲ្យសម្រេចការងារ ដែលជួយធ្វើឲ្យកាន់តែប្រសើរឡើងបន្ថែមទៀតដល់ទំនាក់ទំនងទ្វេភាគី ក្នុង «កម្រិតខ្ពស់ថ្មីមួយ នៅដំណាក់កាលជាក់ស្តែង» ដើម្បីជាកត្តាពង្រឹងដល់ «ជោគជ័យ» នៃដំណើរទស្សនកិច្ចរបស់លោក នៅប្រទេសរុស្ស៊ី។

ទីភ្នាក់ងារសារព័ត៌មាន KCNA បានរាយការណ៍ថា លោក គីម បានគូសបញ្ជាក់អំពីតម្រូវការ ក្នុងការពង្រីកកិច្ចសហប្រតិបត្តិការទ្វេភាគីលើគ្រប់វិស័យ ដែលបានរួមចំណែកយ៉ាងសំខាន់ ក្នុងការលើកកម្ពស់សុខុមាលភាពរបស់ប្រជាជននៃប្រទេសទាំង២។

ប៉ុន្តែដោយមិនមានការផ្តល់ព័ត៌មានជាក់លាក់ណាមួយ អំឡុងទស្សនកិច្ច ដែលបានឃើញថា លោក គីម បានជួបជាមួយប្រធានាធិបតីលោក វ្ល៉ាឌីមៀរ ពូទីន ហើយបានទៅទស្សនាទីតាំងយោធា និងបច្ចេកវិទ្យាសំខាន់ៗរបស់រុស្ស៊ីនោះ កូរ៉េខាងត្បូង និងសម្ព័ន្ធមិត្ត រួមទាំងសហរដ្ឋអាមេរិកផងដែរ មិនសប្បាយចិត្តនោះឡើយ ខណៈបណ្ដាអ្នកជំនាញនានាបានប៉ាន់ស្មានថា ប្រទេសទាំង២ ទំនងជាបានពិភាក្សាគ្នាលើកិច្ចព្រមព្រៀងផ្ទេរអាវុធដែលជាប់ការហាមឃាត់ និងវិធានការសហប្រតិបត្តិការផ្សេងទៀត អំឡុងទស្សនកិច្ចរយៈពេល ៦ថ្ងៃ កាលពីសប្តាហ៍មុននេះ។

សហរដ្ឋអាមេរិក កូរ៉េខាងត្បូង និងដៃគូរបស់ខ្លួនបានព្រមានថា រុស្ស៊ី និងកូរ៉េខាងជើង នឹងទទួលបានផលតបស្នងវិញជាមិនខាន ប្រសិនបើពួកគេពិតជាបន្តកិច្ចព្រមព្រៀងបែបនេះ ដោយបំពានលើសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ដែលហាមឃាត់ការធ្វើពាណិជ្ជកម្មអាវុធជាមួយកូរ៉េខាងជើង។ រុស្ស៊ីដែលជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ បានបោះឆ្នោតគាំទ្រសេចក្តីសម្រេចទាំងនោះរបស់អង្គការសហប្រជាជាតិ៕