កូរ៉េខាងជើង៖ កូរ៉េខាងជើងបាននិយាយនៅថ្ងៃចន្ទនេះថា ការអនុញ្ញាតរបស់សហរដ្ឋអាមេរិកឲ្យកូរ៉េខាងត្បូង ផលិតមីស៊ីលកាន់តែមានឥទ្ធិពលថែមទៀត គឺជាគំរូនៃគោលនយោបាយអរិភាពរបស់សហរដ្ឋអាមេរិកប្រឆាំងនឹងកូរ៉េខាងជើង ដោយព្រមានថា វាអាចនឹងនាំឲ្យស្ថានភាពកាន់តែយ៉ាប់យ៉ឺន និងអស្ថិរភាពនៅឧបទ្វីបកូរ៉េ។
នេះគឺជាការឆ្លើយតបលើកទី១ របស់កូរ៉េខាងជើងទៅនឹងជំនួបកំពូលថ្ងៃទី២១ ខែឧសភារវាងមេដឹកនាំសហរដ្ឋអាមេរិក និងកូរ៉េខាងត្បូង អំឡុងសហរដ្ឋអាមេរិកបញ្ចប់ការរឹតត្បិតរាប់ទសវត្សរ៍ ដែលគ្របដណ្ដប់លើការអភិវឌ្ឍន៍មីស៊ីលរបស់កូរ៉េខាងត្បូង និងអនុញ្ញាតឲ្យសម្ព័ន្ធមិត្តរបស់ខ្លួនអភិវឌ្ឍន៍គ្រឿងសព្វាវុធគ្មានដែនកំណត់។ ការចោទប្រកាន់លើគោលនយោបាយអរិភាពរបស់សហរដ្ឋអាមេរិក ចំពោះកូរ៉េខាងជើងនឹងធ្វើឲ្យបញ្ហាកាន់តែរីកធំ ព្រោះប្រទេសឯកោមួយនេះបាននិយាយថា ខ្លួននឹងមិនវិលត្រឡប់ទៅរកកិច្ចចរចាវិញឡើយ ល្គឹកណាគោលនយោបាយអរិភាពរបស់សហរដ្ឋអាមេរិកនៅតែមាន។
ប៉ុន្តែសេចក្ដីថ្លែងការណ៍ចុងក្រោយនៅតែពិពណ៌នាបន្ថែម ពីអ្នកធ្វើអត្ថាធិប្បាយជាលក្ខណៈបុគ្គលមិនមែនតំណាងឲ្យរដ្ឋាភិបាល ដោយលើកឡើងថា កូរ៉េខាងជើងនៅតែចង់ទុកឱកាសសម្រាប់ការទូតដ៏សំខាន់ ជាមួយរដ្ឋបាលលោកប្រធានាធិបតី Joe Biden។ យោងតាមទីភ្នាក់ងារសារព័ត៌មាន KCNA លោក Kim Myong Chol មន្ត្រីទទួលបន្ទុកកិច្ចការអន្តរជាតិរបស់កូរ៉េខាងជើងបាននិយាយថា ជំហានចុងក្រោយគឺជាការក្រើនរម្លឹកដល់គោលនយោបាយអរិភាព របស់សហរដ្ឋអាមេរិក ដែលមានចំពោះកូរ៉េខាងជើង និងកិច្ចព្រមព្រៀងទ្វេដងដែលគ្មានការខ្មាសអៀន៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
