ម៉ារ៉ុក ៖ រដ្ឋមន្ត្រីទទួលបន្ទុកថវិកា បាននិយាយកាលពីថ្ងៃសុក្រថា រញ្ជួយដីនៅប្រទេសម៉ារ៉ុក បានបំផ្លាញភូមិចំនួន ២.៩៣០ភូមិ នៅតំបន់ភ្នំ High Atlas ដែលមានប្រជាជនសរុបចំនួន ២,៨ លាននាក់រស់នៅ។ ការរញ្ជួយដីកម្រិត ៦,៨ រ៉ិចទ័រ បានវាយប្រហារកាលពីថ្ងៃទី ៨ ខែកញ្ញា បណ្តាលឲ្យមនុស្សជាង ២.៩០០នាក់ស្លាប់ ដែលភាគច្រើនរស់នៅក្នុងតំបន់ភ្នំដែលពិបាកចូលទៅដល់។ រដ្ឋមន្ត្រីលោក ហ្វាអ៊ូស៊ីឡេកចា( Faouzi Lekjaa) បាននិយាយនៅក្នុងបទបង្ហាញមួយនៅសភាថា យ៉ាងហោចណាស់លំនៅឋានចំនួន ៥៩.674ខ្នង ត្រូវបានបំផ្លាញ ដែលក្នុងនោះ ៣២ ភាគរយបានបាក់រលំទាំងស្រុង។

លោកបាននិយាយថា រដ្ឋាភិបាលនឹងផ្តល់ប្រាក់ចំនួន ២៤៤ ដុល្លារអាមេរិក ក្នុងមួយខែ រយៈពេលជាង១ឆ្នាំ ជាជំនួយដល់គ្រួសារដែលរងគ្រោះដោយរញ្ជួយដី បន្ថែមពីលើប្រាក់សំណងចំនួន ១៤០.០០០ ប្រាក់ឌីហាម (dirhams) ដែលបានចំណាយសម្រាប់លំនៅឋានដែលត្រូវបានបំផ្លាញទាំងស្រុង និង ៨០.០០០ សម្រាប់លំនៅឋានដែលខូចខាតដោយផ្នែក។ លោក Lekjaa បាននិយាយថា ការកសាងឡើងវិញនឹងគោរពតាមលក្ខណៈស្ថាបត្យកម្មដើមនៃតំបន់ភ្នំ High Atlas ។

ការរញ្ជួយដីនេះ បានបណ្តាលឲ្យមនុស្សស្លាប់ច្រើនបំផុតនៅប្រទេសម៉ារ៉ុក ចាប់តាំងពីឆ្នាំ ១៩៦០ បានបំផ្លាញភូមិតូចៗជាច្រើនដែលផ្ទះសង់ឡើងដោយឥដ្ឋដីភក់បែបបុរាណ និងផ្ទះឈើរ និងថ្ម នៅតំបន់ភ្នំ Atlas ។

ព្រះបរមរាជវាំង បាននិយាយកាលពីថ្ងៃពុធថា ជារួម ប្រទេសម៉ារ៉ុកគ្រោងនឹងចំណាយប្រាក់ចំនួន ១២០ ពាន់លាន ឌីហាម(dirhams) លើផែនការកសាងឡើងវិញក្រោយការរញ្ជួយដី ដែលរួមបញ្ចូលទាំងការធ្វើឱ្យប្រសើរឡើងវិញហេដ្ឋារចនាសម្ព័ន្ធក្នុងរយៈពេល ៥ឆ្នាំ ខាងមុខ។