ភ្នំពេញ ៖ ស្ថានទូតចិតប្រចាំកម្ពុជា សមាគមប្រជាជនយូណានដើម្បីមិត្តភាពជាមួយបរទេស រាជបណ្ឌិត្យសភាកម្ពុជា និងស្ថាប័នពាក់ព័ន្ធមួយចំនួនទៀត នៅរសៀលថ្ងៃទី២២ខែកញ្ញាម្សិលមិញ បានរៀបចំពិធីប្រកាសលទ្ធផលនៃកម្មវិធី «iYunna»ដើរមកកាន់ប្រទេសកម្ពុជា ដែលជាសកម្មភាពមួយក្នុងចំណោមពិធីអបអរខួបអនុស្សាវរីយ៍លើកទី៦៥ទំនាក់ទំនងកម្ពុជា-ចិន។

 កម្មវិធីនេះ រៀបចំឡើងនៅរាជបណ្ឌិត្យសភាកម្ពុជា ដែលមានការអញ្ជើញចូលរួមជាអធិបតីភាពពីឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្ត្រីក្រសួងអប់រំ យុវជន និងកីឡា ឯកឧត្តម ឆាង ចៀន (Chang Jian) ទទួលបានបន្ទុកកិច្ចការអគ្គរដ្ឋទូតប្រទេសចិនប្រចាំកម្ពុជា និងលោកជំទាវហ្សឺង យាន (Zen yan) សមាជិកគណៈអចិន្រ្តៃយ៍នៃគណៈកម្មាធិការគណបក្សកម្មុយនីស្តខេត្តយូណាន។

នៅក្នុងឱកាសនោះ ឯកឧត្តមបណ្ឌិតសភាចារ្យ ហង់ជួន ណារ៉ុន ថ្លែងថា ក្រោមការដឹកនាំ របស់មេដឹកនាំប្រទេសទាំងពីរ មិត្តភាពកម្ពុជា-ចិននឹងបន្តភ្លឺស្វាងជាមួយនឹងភាពរឹងមាំថ្មី។ ហើយកាលពីពេលថ្មីៗនេះ សម្តេចមហាបវរធិបតី ហ៊ុន ម៉ាណែត បានទៅបំពេញទស្សនកិច្ចនៅប្រទេសចិនជាលើកដំបូង បន្ទាប់ពីចូលកាន់តំណែង ដោយបានឆ្លុះបញ្ចាំងពីការអនុវត្តយ៉ាងម៉ឺងម៉ាត់របស់កម្ពុជា ចំពោះគោលនយោបាយមិត្តភាពចំពោះប្រទេសចិន។ 

ឯកឧត្តម ឆាង ចៀនតំណាងស្ថានទូតចិនប្រចាំកម្ពុជាមានប្រសាសន៍ដែរថា ប្រទេសកម្ពុជា និងចិន គឺជាអ្នកជិតខាងមិត្តភាពប្រពៃណី ហើយទំនាក់ទំនងមិត្តភាពប្រពៃណីរវាងកម្ពុជា និងចិន បានរួមគ្នាបង្កើត និងបណ្តុះយ៉ាងយកចិត្តទុកដាក់ដោយមេដឹកនាំជំនាន់មុននៃប្រទេសទាំងពីរ ហើយបានចាក់ឫសគល់យ៉ាងជ្រៅ នៅក្នុងបេះដូងរបស់ប្រជាជន។ 

ជាមួយគ្នានេះ ជំទាវហ្សឺង យាន (Zen yan) សមាជិកគណៈអចិន្រ្តៃយ៍នៃគណៈកម្មាធិការគណបក្សកម្មុយនីស្តខេត្តយូណាន បានមានប្រសាសន៍ដែរថា កម្មវិធី “iYunnan” បានដើរចេញពីប្រទេសចិន មកកាន់ប្រទេសកម្ពុជា ហើយទទួលបានការសាទរ និងមានការចូលរួមយ៉ាងសកម្មពីគ្រប់មជ្ឈដ្ឋានក្នុងប្រទេសកម្ពុជា។ កម្មវិធីនេះ ក៍បានរួមចំណែកពង្រឹងទំនាក់ទំនងនៃប្រទេសទាំងពីរឱ្យកាន់តែល្អបន្ថែមទៀតផងដែរ។ 

គួរបញ្ជក់ដែរថា កម្មវិធី "iYunnan" គឺជាម៉ាកយីហោផ្លាស់ប្តូរមិត្តភាពក្រៅរដ្ឋាភិបាល ដែលប្រកបដោយភាពច្នៃប្រឌិត បង្កើតឡើងដោយសមាគមប្រជាជនខេត្តយូណានសម្រាប់មិត្តភាពជាមួយបរទេស។ ហើយកម្មវិធីនេះ ចាប់ដំណើរនៅប្រទេសកម្ពុជាតាំងពីខេត្តកក្កដា ឆ្នាំ២០២៣ ៕ អត្ថបទ៖ ទូច សោភ័ណ