ភ្នំពេញ ៖ មានប្រសាសន៍នៅក្នុងពីធីជប់លៀងសាយភោជន៍ នារាត្រីថ្ងៃទី ២២ ខែកញ្ញា ឆ្នាំ២០២៣ ក្រោយពេលបិទបញ្ចប់កិច្ចប្រជុំថ្នាក់ដឹកនាំលើកទី២០ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាប្រធានដឹកនាំកិច្ចប្រជុំថ្នាក់ដឹកនាំកាកបាទក្រហម និងអឌ្ឍចន្ទក្រហម ភូមិភាគអាស៊ីអាគ្នេយ៍ បានមានប្រសាសន៍ជាមួយនឹងមោទនភាពដែលបានរៀបចំកិច្ចប្រជុំប្រកបដោយជោគជ័យគួរជាទីមោទនៈ ព្រមទាំងបានអញ្ជើញប្រតិភូទាំងអស់ចូលរួមពិធីជប់លៀងសាយភោជន៍ ដើម្បីអបអរសាទរ នូវការសម្រេចបានសេចក្តីថ្លែងការណ៍រាជធានីភ្នំពេញ ដែលជាលទ្ធផលនៃកិច្ចប្រជុំថ្នាក់ដឹកនាំលើកទី២០ និងវេទិកាយុវជនលើកទី២ ពីថ្ងៃទី ១៧ មកដល់ថ្ងៃទី២២ ខែកញ្ញា ឆ្នាំ២០២៣។ 

សម្ដេចប្រធានបានមានប្រសាសន៍ថា វត្តមានរបស់ សម្តេច ឯកឧត្តម លោកជំទាវ អ្នកឧកញ៉ា លោក លោកស្រី គឺជា សក្ខីភាពនៃកម្លាំងសាមគ្គីភាពរឹងមាំ, ស្មារតីនៃការចែករំលែក, ក្តីស្រឡាញ់រាប់អាន ការជឿជាក់លើ កិច្ចសហប្រតិបត្តិការកាន់តែរឹងមាំ ដូចសុភាសិតចែងថា “បើចង់ដើរលឿន ដើរម្នាក់ឯង, បើចង់ដើរបានឆ្ងាយ ដើរទាំងអស់គ្នា”។

ក្នុងឱកាសនោះសម្ដេចកិត្តិព្រឹទ្ធបណ្ឌិត ក៏ថ្លែងអំណរគុណយ៉ាងជ្រាលជ្រៅបំផុត ចំពោះ សម្ដេច ឯកឧត្ដម លោកជំទាវ អ្នកឧកញ៉ា លោក លោកស្រី និងភ្ញៀវកិត្តិយសទាំងអស់ ដែលបានអញ្ជើញពីទីជិតឆ្ងាយ មកកាន់រាជធានីភ្នំពេញ នៃព្រះរាជាណាចក្រកម្ពុជា និងស្នាក់នៅទីនេះ រយៈពេលខ្លី តែមានផាសុកភាព មានអនុស្សាវរីយ៍ល្អៗជាមួយគ្នា ពោរពេញដោយការចងចាំ។

ក្នុងឱកាសដ៏សែនមនោរម្យនៃពិធីជប់លៀងសាយភោជន៍ ក៏បានបង្ហាញនូវទស្សនីយភាព សិល្បៈវប្បធម៌ចម្រុះ របស់ភូមិភាគអាស៊ីអាគ្នេយ៍ ហើយសម្ដេចប្រធានក៏បានជូនពរប្រតិភូទាំងអស់ សូមមានសុខភាពល្អ ជោគជ័យក្នុងបុព្វហេតុមនុស្សធម៌ “ទាំងអស់គ្នា ដើម្បីកាកបាទក្រហម និងអឌ្ឍចន្ទក្រហម - កាកបាទក្រហម និងអឌ្ឍចន្ទក្រហម ដើម្បីទាំងអស់គ្នា”។

គួរជម្រាបជូនថា ក្រោយកិច្ចប្រជុំថ្នាក់ដឹកនាំលើកទី២០ និងវេទិកាយុវជនលើកទី២ បានបញ្ចប់ សម្ដេចកិត្តិព្រឹទ្ធបណ្ឌិតក៏បានប្រគល់តួនាទីជាប្រធានប្ដូរវេន ជូនទៅកាន់ប្រតិភូថ្នាក់ដឹកនាំឥណ្ឌូនេស៊ី ដើម្បីបន្តដឹកនាំកិច្ចប្រជុំនៅឆ្នាំ២០២៤៕  ដោយ ៖ សុជាតា