ហៃទី ៖ រដ្ឋបាលលោកបៃដិន និយាយថា ខ្លួនបានទទួលការប្តេជ្ញាចិត្តពីបណ្តាប្រទេសជុំវិញពិភពលោកពីអាមេរិកខាងត្បូង និងការ៉ាអ៊ីប រហូតដល់អាស៊ី និងអាហ្រ្វិក ដើម្បីចូលរួមនៅក្នុងកម្លាំងពហុជាតិ ដែលនឹងដាក់ពង្រាយទៅកាន់ប្រទេសហៃទី ដោយរង់ចាំសេចក្តីសម្រេចពីក្រុមប្រឹក្សាសន្តិសុខអង្គការសហប្រជាជាតិ។

ការប្ដេជ្ញាចិត្តនេះ ពិតជាមានសារៈសំខាន់ណាស់ ដោយសារតែប្រទេសកេនយ៉ា ដែលបានស្ម័គ្រចិត្តដឹកនាំបេសកកម្ម ដើម្បីជួយកងកម្លាំងនគរបាល ដែលកំពុងតស៊ូរបស់ប្រទេសហៃទី ប្រយុទ្ធប្រឆាំងនឹងក្រុមជនអន្ធពាលដ៏ឃោរឃៅ បានកំណត់លក្ខខណ្ឌនៃការចូលរួមរបស់ខ្លួនលើកត្តាជាច្រើន។ ពួកគេរាប់បញ្ចូលទាំងគាំទ្ររបស់ក្រុមប្រឹក្សាសន្តិសុខ និងការដាក់ពង្រាយមន្ត្រីអនុវត្តច្បាប់យ៉ាងតិច ២.០០០ នាក់ ដោយប្រទេសកេនយ៉ាផ្ទាល់ បានបញ្ជូន ១.០០០នាក់ ជាមួយនឹងការចូលរួមចំណែកមិនត្រឹមតែមកពីតំបន់ការ៉ាអ៊ីប ប៉ុណ្ណោះទេ ថែមទាំងមកពីប្រទេសផ្សេងទៀតផងដែរ។

អនុរដ្ឋមន្ត្រីការបរទេសស្តីទី លោកស្រី Victoria J. Nuland បានថ្លែងកាលពីថ្ងៃសុក្រ បន្ទាប់ពីរដ្ឋមន្ត្រីការបរទេសលោកអង់តូនី ប្ល៊ីនខិន (Antony Blinken) បានបញ្ចប់កិច្ចប្រជុំនៅក្រៅវេទិកាមហាសន្និបាតអង្គការសហប្រជាជាតិស្តីពីស្ថានភាពសន្តិសុខនៅប្រទេសហៃទីថា៖«យើងមានបណ្តាប្រទេសមកពីគ្រប់ទ្វីបទាំងអស់ ដែលមានបំណងចូលរួមវិភាគទាននៅទីនេះ ដល់ប្រទេសហៃទី»។ 

កិច្ចប្រជុំរបស់លោកប្ល៊ីនខិន បានទាក់ទាញឯកអគ្គរដ្ឋទូត រដ្ឋមន្ត្រីការបរទេស និងអ្នកតំណាងមកពី ប្រទេសនានា ចំនួន៣៤រូប ដែលមួយចំនួនក្នុងចំណោមពួកគេជាសមាជិកអចិន្ត្រៃយ៍ និងមិនអចិន្ត្រៃយ៍នៃក្រុមប្រឹក្សាសន្តិសុខ។ លោកស្រី Nuland បានថ្លែងថា ខណៈពេលដែលអ្នកខ្លះ បានចេញមុខមកជាមួយនឹងការផ្តល់ការគាំទ្រជាក់ស្តែង អ្នកផ្សេងទៀតនៅក្នុងបន្ទប់បាននិយាយថា ពួកគេនឹងស្វែងរកវិធីដើម្បីគាំទ្របេសកកម្មនេះ។