ព្យុះត្រូពិក Ophelia បានបោកបក់មកដល់តំបន់ឆ្នេរសមុទ្រអាត្លង់ទិក របស់សហរដ្ឋអាមេរិក ជាមួយ​នឹងខ្យល់បក់ និងភ្លៀងធ្លាក់ខ្លាំង បង្កឲ្យមានទឹកជំនន់ និងដាច់ចរន្តអគ្គិសនី ។

សេវាកម្មឧតុនិយមជាតិសហរដ្ឋអាមេរិក និយាយថា មនុស្សជិត ៨លាននាក់​នៅ​តាម​តំបន់​ឆ្នេរ​អាត្លង់ទិក​ ចាប់ពីរដ្ឋ New York ដល់រដ្ឋ South Carolina ស្ថិតក្រោមការព្រមានពីព្យុះ ការកញ្ជ្រោលឡើង​របស់ព្យុះ និងទឹកជំនន់ ។

ក្រោយ​បោកបក់ដល់ដីគោកនៅកោះ Emerald រដ្ឋ North Carolina កាលពីវេលាម៉ោង ៦ និង ១៥នាទី ព្រឹកថ្ងៃសៅរ៍ ព្យុះ Ophelia បានបោក​បក់​ចូល​ដីគោក​តាម​ផ្លូវ​នៅភាគ​ខាង​ជើង​សហរដ្ឋ​អាមេរិក ពេលដែលវានាំមកជាមួយភ្លៀងធ្លាក់ខ្លាំង និងខ្យល់បក់ខ្លាំង ។

នៅតំបន់មួយចំនួន គេបានមើលឃើញភ្លៀងធ្លាក់កម្ពស់ ២៥សង់ទីម៉ែត្រ និងខ្យល់បក់ក្នុងល្បឿន ៨០គ.មក្នុង១ម៉ោង ៕