ទូរទស្សន៍កណ្តាលចិន (CCTV) បានរាយការណ៍ថា ប្រធានាធិបតីចិន លោក ស៊ី ជីនពីង បាន​ជួប​ជាមួយ​នាយករដ្ឋ​មន្ត្រីកូរ៉េខាងត្បូង លោក ហាន ដុកស៊ូ (Han Duck-soo) កាលពីថ្ងៃសៅរ៍ (២៣ កញ្ញា) នៅទីក្រុងហាងចូវ (Hangzhou) ភាគខាងកើតប្រទេសចិន មុន​ពេល​បើក​ការ​ប្រកួត​កីឡាអាស៊ី។

លោក ស៊ី បានប្រាប់នាយករដ្ឋមន្ត្រីកូរ៉េខាងត្បូង លោក ហាន ដុកស៊ូ ថា ប្រទេស​ចិន​មាន​ឆន្ទៈ​ក្នុង​ការ​ធ្វើការ ដើម្បីលើកកម្ពស់ភាពជាដៃគូយុទ្ធសាស្ត្ររវាងប្រទេសទាំងពីរ នេះបើ​យោង​តាម​ទូរទស្សន៍​ CCTV ។

ដោយឡែក ទីភ្នាក់ងារសារព័ត៌មាន យ៉ុនហាប់ របស់កូរ៉េខាងត្បូង បានរាយការណ៍ថា លោក ស៊ី បាន​និយាយថា លោក​នឹង​ពិចារណា​យ៉ាង​ហ្មត់​ចត់​ចំពោះ​ដំណើរ​ទស្សនកិច្ច​ទៅ​កាន់​ប្រទេស​កូរ៉េខាង​ត្បូង ដែលជាផ្នែកនៃកិច្ចខិតខំប្រឹងប្រែងដើម្បីគាំទ្រសន្តិភាព និង​សន្តិសុខ​នៅ​លើ​ឧបទ្វីប​កូរ៉េ។​

យោងតាមទូរទស្សន៍ CCTV បានឱ្យដឹងថា ប្រទេសចិនយកចិត្តទុកដាក់យ៉ាងខ្លាំង ចំពោះ​ឆន្ទៈ​វិជ្ជមាន​របស់​កូរ៉េខាងត្បូង ក្នុងការប្តេជ្ញាចិត្តចំពោះកិច្ចសហប្រតិបត្តិការ ហើយលោក​បាន​ស្នើ​ឱ្យ​កូរ៉េខាង​ត្បូង ធ្វើតាម​ការ​ ព្រមព្រៀង ដើម្បី​រក្សាទិស​ដៅ​នៃ កិច្ច​សហប្រតិបត្តិការ​មិត្ត​ភាព​បន្ត​ទៅ​ទៀត​ផង​ដែរ​៕