នាយករដ្ឋមន្រ្តីប៉ូឡូញ លោក Mateusz Morawiecki បានប្រាប់ប្រធានាធិបតីអ៊ុយក្រែន លោក Volodymyr Zelensky កុំឱ្យ «ប្រមាថជនជាតិប៉ូឡូញម្តងទៀតឲ្យសោះ» បន្ទាប់​ពី​ប្រធានាធិបតី​អ៊ុយក្រែន​រូប​នេះ បាននិយាយ​ថា​ អ្នក​ជិត​ខាង​របស់​ខ្លួន​កំពុង​សម្ដែង​អំពី​ជម្លោះ​របស់​ពួក​គេ​លើការ​នាំ​ចេញ​គ្រាប់ធញ្ញជាតិ។

មេដឹកនាំប៉ូឡូញរូបនេះ បានវយប្រហារលោក Zelensky វិញ បន្ទាប់ពីមេដឹកនាំអ៊ុយក្រែនរូបនោះ បាន​ផ្តល់ការរិះគន់យ៉ាងបញ្ឆិតបញ្ឆៀងចំពោះប៉ូឡូញ នៅឯ​មហាសន្និបាត​អង្គការ​សហ​ប្រជាជាតិ​ក្នុង​សប្តាហ៍​នេះ ដោយនិយាយថាជម្លោះនេះគឺជា «ឆាកល្ខោននយោបាយ» ហើយថា «មិត្ត​របស់​យើង​មួយ​ចំនួននៅអឺរ៉ុប» បានធ្វើឱ្យមានការភ្អាក់ផ្អើលជុំវិញជម្លោះគ្រាប់ធញ្ញជាតិនេះផងដែរ។

លោក Morawiecki បាននិយាយថា «ខ្ញុំចង់ប្រាប់លោកប្រធានាធិបតី Zelensky កុំឱ្យ​ប្រមាថ​ជន​ជាតិ​ប៉ូឡូញម្ត​ងទៀត ដូចដែលលោក​បាន​ធ្វើ​នាពេ​ល​ថ្មី​ៗ​នេះ​ក្នុង​អំឡុង​ពេល​សុន្ទរកថា​របស់​ខ្លួន​នៅ​អង្គការ​សហប្រជាជាតិ ឲ្យសោះ»។

ការអត្ថាធិប្បាយរបស់លោក Morawiecki ប្រឈម​នឹង​ហានិភ័យ​ នៃ​ការ​បែកបាក់​កាន់​តែស៊ី​ជម្រៅ​រវាង​ប្រទេស​ទាំងពីរ ដែលពីមុន​ជា​សម្ព័ន្ធ​មិត្ត​ជិតស្និទ្ធ​នឹង​រួបរួម​គ្នា​ប្រឆាំង​នឹង​ការ​ឈ្លាន​ពាន​របស់​រុស្ស៊ី​លើ​អ៊ុយក្រែន៕