នគរបាលន័រវេស បានចាប់ខ្លួនអតីតមេបញ្ជាការក្រុមទាហានស៊ីឈ្នួលរុស្ស៊ី Wagner ដោយ​សង្ស័យថា​បុរសរូបនោះ បានព្យាយាមឆ្លងដែនខុសច្បាប់ត្រឡប់ទៅប្រទេសរុស្ស៊ីវិញ បន្ទាប់​ពី​ស្វែង​រក​សិទ្ធិ​ជ្រកកោន នៅប្រទេសន័រវេសកាលពីដើមឆ្នាំនេះ នេះបើយោងតាម​មេធាវី​របស់​ជន​សង្ស័យ​បាន​និយាយ​កាលពីថ្ងៃសៅរ៍ (២៣ កញ្ញា)។

លោក Andrei Medvedev ដែលបានរត់គេចពីប្រទេសរុស្ស៊ី កាលពីខែមករា តាមព្រំដែន​អាកទិក​ជាមួយ​ន័រវេស បានពិពណ៌នាថាខ្លួនកំពុងរត់គេច ខណៈដែល​ឆ្មាំរុស្ស៊ី​បាន​បាញ់​ប្រហារ​មក​លើ​ខ្លួន​។ លោកបាននិយាយអំពីការប្រយុទ្ធរបស់លោកនៅអ៊ុយក្រែន ដែល​ជា​ផ្នែក​មួយ​នៃ​ក្រុម​ទាហាន​ស៊ីឈ្នួល ​Wagner ផងដែរ។

នៅពេ​លទៅដល់ប្រទេសន័រវេស លោក Medvedev បាននិយាយថា ខ្លួនកំពុង​ស្វែង​រក​សិទ្ធិ​ជ្រក​កោន ​ដោយសារតែលោកភ័យខ្លាចចំពោះគ្រោះថ្នាក់ដល់អាយុជីវិតរបស់ខ្លួន បន្ទាប់ពី​បាន​ឃើញ​ការ​សម្លាប់ និងធ្វើបាបអ្នកទោសរុស្ស៊ី ដែលនាំទៅដល់ជួរមុខក្នុង ប្រទេសអ៊ុយក្រែន។

ការ​រ​​ត់គេចខ្លួនរបស់លោក Medvedev កាលពីខែមករា បាន​ធ្វើ​ឱ្យ​មាន​ការ​ភ្ញាក់​ផ្អើល​ជុំវិញ​ពិភព​លោក​ថា ជាឧទាហរណ៍​ដ៏​កម្រ​មួយ​នៅ​ពេល​មាន​មនុស្ស​ម្នាក់​រត់​ចោល​ស្រុក​ទៅ​ប្រទេស​លោក​ខាង​លិច ​ខណៈពេលដែលអះអាងថា បានប្រយុទ្ធ​ឱ្យ​រុស្ស៊ី​ក្នុង​នាម​ជា​ទាហាន​ស៊ី​ឈ្នួល​ក្នុង​សង្គ្រាម​អ៊ុយក្រែន​៕