កងកម្លាំងណាតូ រួមជាមួយសមាជិកនៃកងកម្លាំងនគរបាលសហភាពអឺរ៉ុប EULEX និង​នគរបាល​កូសូវ៉ូ​ បានល្បាតនៅលើផ្លូវមួយនៅភាគខាងជើងកូសូវ៉ូនៅថ្ងៃអាទិត្យ (២៤ កញ្ញា) នេះ បន្ទាប់​ពី​នាយករដ្ឋ​មន្ត្រី​កូសូវ៉ូបាននិយាយថា មន្ត្រីនគរបាលម្នាក់ត្រូវបានសម្លាប់ និងម្នាក់ទៀត​រង​របួស​អំឡុង​ពេល​ការបាញ់ប្រហារនៅក្នុងភូមិមួយក្នុងតំបន់នោះ។

នាយករដ្ឋមន្ត្រី​កូសូវ៉ូ លោក Albin Kurti បានពណ៌នាឧបទ្ទវហេតុនេះថា ជាសកម្មភាពភេរវកម្ម ហើយ​អ្នកវាយប្រហារថាមានអាវុធយ៉ាងច្រើន និងពាក់ម៉ាស់ទៀតផង។

នគរបាល​កូសូវ៉ូបាននិយាយនៅក្នុងសេចក្តីថ្លែងការណ៍មួយថា រថយន្តធុនធ្ងន់ពីរគ្រឿង ដែលគ្មាន​ស្លាក​លេខ​ត្រូវបានចតទុកនៅលើស្ពានមួយនៅក្នុងភូមិ Banjska នៅព្រឹកថ្ងៃអាទិត្យនេះ ដោយ​បាន​រារាំងច្រកចូល និងបើកការបាញ់ប្រហារទៅលើអង្គភាពនគរបាលដែលទៅដល់ «ជា​មួយ​នឹង​អាវុធ​ជា​ច្រើន​ប្រភេទ រួមទាំងគ្រាប់បែកដៃ និងជើងទម្រនៃឧបករណ៍បាញ់កាំភ្លើងផងដែរ»។

គួររម្លឹក​ផងដែរថា ភាពតានតឹងបានកើនឡើងក្នុងប្រទេសកូសូវ៉ូ បន្ទាប់ពី​មាន​ការ​ប៉ះ​ទង្គិច​គ្នា​កាល​ពី​ខែ​ឧសភា នៅពេលទាហានរក្សាសន្តិភាពណាតូជាង៩០នាក់ និង​បាតុករ​ស៊ែរ​ប៊ី​ប្រមាណ​៥០​នាក់​ បានរងរបួសនៅភាគខាងជើងកូសូវ៉ូ៕