ភ្នំពេញ៖ អង្គការ UNDP និងក្រសួងសង្គមកិច្ច នៅថ្ងៃទី៣១ ខែឧសភា ឆ្នាំ២០២១នេះ បានចុះហត្ថលេខា ដើម្បីធ្វើការជាមួយគ្នាក្នុងការរៀបចំការងារសំខាន់ៗចំនួន ០៤ចំណុច ដើម្បីបង្កើនគុណភាពសេវាកម្មជូនមនុស្សវ័យចាស់នៅកម្ពុជា។
ក្នុងឱកាសចុះអនុស្សរណៈនេះ ឯកឧត្តម វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និង យុវនីតិសម្បទា មានប្រសាសន៍ថា ការគោរព និងការយកចិត្តទុកដាក់ចំពោះមនុស្សវ័យចាស់ គឺជាអ្វីដែលមានសារសំខាន់សម្រាប់វប្បធម៌ខ្មែរ។ ក្នុងស្មារតីនេះ ការធានាឱ្យមនុស្សចាស់រស់នៅប្រកបដោយគុណភាពកម្រិតខ្ពស់ តែងតែជាអាទិភាពជាយុទ្ធសាស្ត្ររបស់រាជរដ្ឋាភិបាលកម្ពុជា។ ផ្អែកតាមគោលនយោបាយជាតិស្ដីពីមនុស្សវ័យចាស់ រាជរដ្ឋាភិបាលនឹងសហការជាមួយ UNDP ក៏ដូចជា ដៃគូដទៃទៀត ដើម្បីលើកកម្ពស់សុខុមាលភាពមនុស្សវ័យចាស់នៅ កម្ពុជា និង កសាងនូវប្រព័ន្ធគាំពារសង្គមដែលកាន់តែរស់រវើកមួយ សម្រាប់គាំទ្រដល់ប្រជាជនគ្រប់រូប ពេញមួយវដ្ត នៃ ជីវិតរបស់ពួកគាត់។
សម្រាប់ការចុះហត្ថលេខារវាងអង្គការ UNDP និងក្រសួងសង្គមកិច្ច នាពេលនេះ គឺផ្តោតសំខាន់លើការបំពេញការងាររួមគ្នា លើកម្មវិធីសំខាន់ៗចំនួន ៤ ដើម្បីបង្កើនប្រសិទ្ធភាព និង គុណភាព នៃ ការផ្តល់សេវាកម្មជូនមនុស្សវ័យចាស់នៅកម្ពុជា។ នេះគឺជាការលើកឡើងរបស់លោក គុណ ជាស៊ីន ប្រធាននាយកដ្ឋានសុខុមាលភាពមនុស្សចាស់ នៃ ក្រសួងសង្គមកិច្ច។
ក្នុងឱកាសដដែលនេះ លោក Nick Beresford នាយក UNDP ប្រចាំកម្ពុជា មានប្រសាសន៍ថា ប្រទេសកម្ពុជា មានប្រពៃណីវប្បធម៌ដ៏ល្អផូរផង់ ក្នុងការគោរព ដឹងគុណ និង ទំនុកបម្រុងមនុស្សវ័យចាស់ ដែលប្រការនេះ ស្របទៅនឹងអ្វីដែលអង្គសហប្រជាជាតិផ្តល់ជូនដែរ។
លោកបន្តថា កម្ពុជា ជាប្រទេសដែលមានប្រជាជនវ័យក្មេងច្រើន ក៏ប៉ុន្តែស្ថានភាពនេះនឹងមានការប្រែប្រួល។ លោកថា វាជារឿងចាំបាច់ត្រូវធ្វើសកម្មភាពចាប់ពីពេលនេះ ដើម្បីដាក់ឱ្យអនុវត្តនូវប្រព័ន្ធសោធននិវត្តន៍សម្រាប់មនុស្សវ័យចាស់ និងប្រព័ន្ធគាំពារសង្គមដែលផ្ដល់អោយប្រជាជនដែលមានវ័យចាស់ នូវការឧបត្ថម្ភគាំទ្រ ក៏ដូចជាសេចក្ដីថ្លៃថ្នូរដែលពួកគេសមនឹងទទួលបាន។
បច្ចុប្បន្ន កម្ពុជា គឺជាប្រទេសដែលមានប្រជាជនវ័យក្មេងច្រើនជាងគេនៅអាស៊ីអាគ្នេយ៍ ប្រជាជននៅក្នុងប្រទេសនេះក៏កាន់តែមានវ័យចំណស់កាន់តែច្រើនឡើងៗដែរ។ ក្នុងឆ្នាំ ២០១៩ ប្រជាជន ៨,៩ ភាគរយ មានអាយុ ចាប់ពី ៦០ ឆ្នាំឡើងទៅ ដែលទិន្នន័យនេះ បានកើនឡើង ៥,២៥ ភាគរយ ក្នុងរយៈពេលពីរទសវត្សរ៍កន្លងទៅនេះ ហើយតួលេខនេះត្រូវបានរំពឹងថា នឹងកើនឡើងដល់ ២១ ភាគរយ ក្នុងឆ្នាំ ២០៥០។ និន្នាការទាំងនេះ មានន័យថា នៅក្នុងរយៈពេលច្រើនទសវត្សរ៍ខាងមុខនេះ ប្រជាជនឋិតក្នុងវ័យកម្លាំងពលកម្មនឹងកាន់តែមានចំនួនតិចទៅៗ ក្នុងការរ៉ាប់រងបន្ទុកជួយឧបត្ថម្ភគាំទ្រដល់ក្រុមមនុស្សវ័យចាស់ដែលកាន់តែមានចំនួនច្រើននៅក្នុងប្រទេសនេះ៕ អត្ថបទ៖ គឹមហុក
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
