ភ្នំពេញ ៖ ប្រជាពលរដ្ឋ ចាស់ជរា យុវជន បានថ្លែងអំណរគុណសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្តនៃព្រះរាជាណាចក្រកម្ពុជា បានខ្នះខ្នែងរកវ៉ាក់សាំងកូវីដ-១៩ មកចាក់ជូនប្រជាជនកម្ពុជា ឲ្យបន្តរស់រានមានជីវិត។

​

មន្រី្តរាជការ ប្រជាពលរដ្ឋ ចាស់ជរា យុវជន នាថ្ងៃទី៣១ ខែឧសភា ឆ្នាំ២០២១នេះ បានមកទទួលការចាក់វ៉ាក់សាំងបង្ការជំងឺកូវីដ-១៩ ប្រភេទស៊ីណូវ៉ាក់ របស់សាធារណរដ្ឋប្រជាមានិតចិន នៅសាលាបឋមសិក្សាសំពៅមាស ខណ្ឌ៧មករា រាជធានីភ្នំពេញ ក្នុងយុទ្ធនាការចាក់វ៉ាក់សាំងកូវីដ-១៩ ដែលប្រព្រឹតិ្តទៅចាប់ពីថ្ងៃទី២៥ ខែឧសភា ដល់ថ្ងៃទី៧ ខែមិថុនា ឆ្នាំ២០២១ និងដូសទី២ ចាប់ពីថ្ងៃទី៨ ខែមិថុនា ដល់ថ្ងៃទី២១ ខែមិថុនា ឆ្នាំ២០២១ បាននិយាយស្រដៀងគ្នាថា ការដែលពួកគាត់បានស្ម័គ្រចិត្តមកចាក់វ៉ាក់សាំងបង្ការជំងឺកូវីដ-១៩ ពិតជាមានសារៈសំខាន់ខ្លាំងណាស់ ព្រោះវាបានចូលរួមជួយការពារខ្លួនគាត់ ក្រុមគ្រួសារ និងអាចធ្វើឲ្យការរស់នៅរបស់ប្រជាពលរដ្ឋវិលទៅរកសភាពធម្មតាវិញ តាមបែបគន្លងថ្មី ជាពិសេសថ្លែងអំណរគុណសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្តនៃព្រះរាជាណាចក្រកម្ពុជា និងថ្នាក់ដឹកនាំ ក៏ដូចជាក្រសួងសុខាភិបាល បានខ្នះខ្នែងរកវ៉ាក់សាំងកូវីដ-១៩ មកចាក់ជូនប្រជាជនកម្ពុជា ឲ្យបន្តរស់រានមានជីវិត។

​

បើតាមលោកជំទាវ វេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស ក៏បានក្រើនរំលឹកដល់បុគ្គលគ្រប់រូប ដែលបានទទួលវ៉ាក់សាំងកូវីដ-១៩រួចហើយកី្ត ក៏ត្រូវតែបន្តអនុវត្តវិធានការ ការពារដែលបានដាក់ចេញឲ្យអនុវត្តតាំងពីថ្ងៃទី១៤ ខែធ្នូ ឆ្នាំ២០២០ ដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្ត គឺ៣ការពារ ៣កុំ ដើម្បីចូលរួមទប់ស្កាត់ការចម្លងវីរុសកូវីដ-១៩ នៅក្នុងសហគមន៍ ក៏ដូចជានៅក្នុងប្រទេសកម្ពុជា៕អត្ថបទ ៖ រដ្ឋា