តាកែវ៖រដ្ឋបាលខេត្តតាកែវបានសម្រេចឱ្យប្រមូលអាជីវករទាំងអស់នៅផ្សាសៃវ៉ាស្ថិតក្នុងស្រុកព្រៃកប្បាស ឱ្យទៅផ្ដល់សំណាកដើម្បីពិនិត្យសុខភាព បន្ទាប់ពីសម្រេចបិទដំណើរការផ្សារជាបណ្ដោះអាសន្ន។
ក្នុងសេចក្ដីសម្រេចចេញនៅថ្ងៃនេះ អភិបាលខេត្តតាកែវ លោក អ៊ូច ភា បានសម្រេចឱ្យបិទជាបណ្ដោះអាសន្នសិននូវដំណើរការអាជីកម្មផ្សារសៃវ៉ា ដែលស្ថិតនៅក្នុងភូមិសៃវ៉ា ឃុំព្រៃផ្ដៅ ចាប់ពីម៉ោង ៤រសៀលថ្ងៃនេះ រហូតដល់មានការជូនដំណឹងជាថ្មី។
អភិបាលខេត្តរូបនេះ បានបញ្ជាក់ក្នុងលិខិតនោះថា រដ្ឋបាលខេត្តសម្រេចបែបនេះ គឺដើម្បីកាត់ផ្ដាច់ការឆ្លងរីករាលដាលនៃជំងឺកូវីដ-១៩នៅក្នុងភូមិសាស្ត្រមួយនេះ។
ក្រៅពីបិទដំណើរការផ្សារជាបណ្ដោះអាសន្នហើយនោះ រដ្ឋបាលខេត្តក៏បានណែនាំឱ្យយកសំណាកពីអាជីវករលក់ដូរនៅក្នុងផ្សារទាំងអស់ ដើម្បីពិនិត្យរកមេរោគកូវីដ-១៩។
រដ្ឋបាលខេត្តនេះ ក៏តម្រូវឱ្យក្រុមអាជីវករ និងសមាជិកក្រុមគ្រួសាររបស់ពួកគេ រក្សាខ្លួននៅដាច់ដោយឡែកផងដែរ ដើម្បីតាមដានសុខភាពខ្លួនឯង ហើយហាមឃាត់ការជួបជុំ ឬការប្រមូលផ្ដុំមនុស្ស៕អត្ថបទ ៖ សុធី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
