ក្រសួងបរិស្ថានរបស់ប្រទេសជប៉ុននិយាយថា សារធាតុទ្រីចូម (Tritium) នៅក្នុងទឹកសមុទ្រ ដែលបង្ហូរចេញពីរោងចក្រថាមពលនុយក្លេអ៊ែរ Fukushima Daiichi ដែលរងការបំផ្លិចបំផ្លាញ នៅតែទាបជាងកម្រិត ដែលអាចរកឃើញ ឬចាប់បាន។

នៅថ្ងៃចន្ទ (ទី២៥ ខែកញ្ញា) នេះ ក្រសួងបានប្រកាសលទ្ធផលនៃការត្រួតពិនិត្យលើសំណាកទឹកប្រចាំសប្តាហ៍ទី៥ របស់ខ្លួន។ ក្រុមមន្ត្រីរបស់ក្រសួងបាន និងកំពុងធ្វើការធ្វើការពិនិត្យតាមដាននេះ ចាប់តាំងពីក្រុមហ៊ុនថាមពលអគ្គិសនីតូក្យូ (TEPCO) បានចាប់ផ្តើមបញ្ចេញទឹកដែលបានធ្វើប្រព្រឹត្តិកម្មរួចហើយ និងដែលនៅសល់សារធាតុវិទ្យុកម្មតិចបំផុតពីរោងចក្រទៅក្នុងមហាសមុទ្រ កាលពីថ្ងៃទី២៤ ខែសីហា។

សំណាកទឹកនៅក្នុងការស្ទង់ថ្មីចុងក្រោយបំផុតនេះត្រូវបានប្រមូល កាលពីថ្ងៃអង្គារសប្តាហ៍មុន ពីទីកន្លែងចំនួន ១១កន្លែង នៅឆ្នេរសមុទ្រនៃខេត្តហ្វូគូស៊ីម៉ា ក្នុងនោះរួមទាំងទីតាំងនៅជិតកន្លែងបញ្ចេញទឹកនេះ និងទីតាំងដែលមានចម្ងាយប្រហែល ៥០គីឡូម៉ែត្រផងដែរ។

ក្រសួងបានឲ្យដឹងថា កំហាប់នៃសារធាតុទ្រីចូមនៅគ្រប់ទាំងកន្លែងទាំងអស់នោះ គឺទាបជាងកម្រិតអប្បបរមា ដែលអាចចាប់បាន គឺ ១០ប៊ើគឺរ៉ែល ក្នុងមួយលីត្រ។ ហើយសារធាតុទ្រីត្យូមនោះ ក៏ស្ថិតនៅក្រោមកម្រិតដែលអាចឃើញបាន នៅក្នុងការស្ទង់ចំនួន ៤ដង នៅមុននេះដែរ។

ក្រសួងគ្រោងនឹងបន្តត្រួតពិនិត្យកម្រិតសារធាតុទ្រីចូមម្តងក្នុងមួយសប្តាហ៍សម្រាប់ពេលនេះ ហើយលទ្ធផលនឹងត្រូវបានផ្សព្វផ្សាយនៅលើគេហទំព័រ និងបណ្ដាញសង្គមរបស់ខ្លួន។

សូមរំលឹកថា មុនពេលបញ្ចេញទឹក ដែលបានធ្វើប្រព្រឹត្តិកម្មរួចហើយទៅក្នុងសមុទ្រ ប្រតិបត្តិកររបស់រោងចក្រ បានធ្វើឲ្យទឹកនោះមានសារធាតុវិទ្យុសកម្មតិចបំផុត ដើម្បីកាត់បន្ថយកម្រិតសារធាតុទ្រីចូមមកត្រឹមប្រហែល ១ភាគ៧នៃគោលការណ៍ណែនាំរបស់អង្គការសុខភាពពិភពលោក សម្រាប់ទឹក ដែលអាចយកមកបរិភោគបាន៕