ប្រធានាធិបតីអ៊ុយក្រែនលោក Volodymyr Zelenskiy បាននិយាយនៅក្នុងសុន្ទរកថានាពេលយប់របស់លោកកាលពីថ្ងៃអាទិត្យថា សហរដ្ឋអាមេរិក បានយល់ព្រមផលិតអាវុធរួមគ្នាជាមួយអ៊ុយក្រែន គឺជាវិធានការមួយលោកចាត់ទុកថាជាការផ្លាស់ប្តូរពិតប្រាកដមកទល់នឹងពេលនេះ ។

លោក Zelenskiy ដែលទើបវិលត្រឡប់ពីដំណើរទស្សនកិច្ចរបស់លោកទៅកាន់សហរដ្ឋអាមេរិក និងប្រទេសកាណាដា បន្តថា កិច្ចព្រមព្រៀងនេះ រួមមានទាំងប្រព័ន្ធការពារដែនអាកាស ដែលចាំបាច់ខ្លាំងសម្រាប់អ៊ុយក្រែន ក្នុងការការពារខ្លួនពីការវាយប្រហារតាមច្រកអាកាសរបស់រុស្ស៊ី ។

លោកបានកោតសរសើរផងដែរដល់កម្លាំងអ៊ុយក្រែន សម្រាប់ជោគជ័យរបស់ពួកគេ អំឡុងការវាយបករយៈពេល ៣ខែកន្លងមកនេះ ប៉ុន្តែលោកពុំបាននិយាយពីដំណើរវិវត្តន៍ថ្មីៗនោះទេ ។

សេចក្តីអធិប្បាយរបស់លោក Zelenskiy បានកើតមាន ពេលដែលកងកម្លាំងរុស្ស៊ី វាយប្រហារទៅលើតំបន់ភាគខាងត្បូង Kherson របស់អ៊ុយក្រែន ដែលបានសម្លាប់មនុស្ស ២នាក់ និងមនុសស ៨នាក់ផ្សេងទៀតរងរបួស ។

អភិបាលតំបន់ Kherson លោក Oleksandr Prodkudin បានសរសេរនៅលើបណ្តាញព័ត៌មានសង្គម Telegram ថា ការផ្លោងគ្រាប់កាំភ្លើងធំពីច្រាំងខាងកើតនៃទន្លេ Dnipro ដែលគ្រប់គ្រងដោយរុស្ស៊ី បានត្រូវចំផ្ទះឯកជនមួយខ្នង ស្ថិតក្នុងភូមិ Beryslav ដែលស្ថិតនៅច្រាំងទន្លេខាងលិច ។ បុរសម្នាក់ បានស្លាប់នៅក្នុងភូមិជិតគ្នា Lvove ៕