ភ្នំពេញ៖ នាយកដ្ឋានប្រយុទ្ធនឹងជំងឺឆ្លង នៃក្រសួងសុខាភិបាល នារសៀលថ្ងៃទី ២៥ ខែកញ្ញា ឆ្នាំាំ ២០២៣នេះ បានឱ្យដឹងថា បានរកឃើញមានការផ្ទុះករណីជំងឺភ្នែកក្រហម ដែលគិតត្រឹមថ្ងៃទី២៥ ខែកញ្ញា ឆ្នាំ២០២៣ មានចំនួន ៩៣ ករណី (ស្រី៥៧នាក់) នៅភូមិប៉ក់តូច ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី ។

 បើតាម នាយកដ្ឋានប្រយុទ្ធនឹងជំងឺឆ្លង ករណីនេះកើតឡើងដោយសារមានករណីដំបូងដែលមានអ្នកភូមិចំនួន ៨ នាក់ កាលពីថ្ងៃទី ១៤ ខែកញ្ញាឆ្នាំ២០២៣ ទៅបុណ្យសពបងប្អូននៅភូមិមួយលើទឹកដីប្រទេសវៀតណាមដែលជាភូមិ មានព្រំប្រទល់ជាប់ និងភូមិប៉ក់តូចនេះ។ 

មន្ត្រីជំនាញនាយកដ្ឋានប្រយុទ្ធនឹងជំងឺឆ្លង ក្រុមឆ្លើយតបបន្ទាន់មន្ទីរសុខាភិបាលខេត្ត មន្ទីរពេទ្យបង្អែកខេត្ត និងមណ្ឌលសុខភាព បានចុះទៅពិនិត្យស្រាវជ្រាវ ផ្តល់ការព្យាបាលថែទាំអ្នកជំងឺ នឹងអប់រំ ភ្លាមៗ បន្ទាប់ពីទទួលបាននូវការរាយការណ៍ពីមណ្ឌលសុខភាពសោមធំនៅយប់ថ្ងៃទី២៣ ខែកញ្ញាឆ្នាំ២០២៣។ នេះបើតាមការបញ្ជាក់របស់ នាយកដ្ឋានប្រយុទ្ធនឹងជំងឺឆ្លង។ 

នាយកដ្ឋានប្រយុទ្ធនឹងជំងឺឆ្លងបានពន្យល់ពី របៀបឆ្លង និងការព្យាបាលថែទាំជំងឺនេះ៖ ការឆ្លងដោយសារការប៉ះពាស់ផ្ទាល់ជិតគ្នា និងប្រើប្រាស់របស់របរ និងសម្ភារៈរួមគ្នា។ ករណីភាគច្រើននៃជំងឺភ្នែកក្រហមគឺស្រាល។ ជាធម្មតាការឆ្លងនឹងជាសះស្បើយក្នុងរយៈពេលពី ៧ ទៅ ១៤ ថ្ងៃដោយមិនតម្រូវឱ្យមានការព្យាបាល និងមិនមានផលវិបាករយៈពេលវែងនោះទេ។ 

ទោះយ៉ាងណាក៏ដោយ ក្នុងករណីខ្លះ ការរលាកភ្នែកដោយវីរុសត្រូវការរយៈពេល ២ ទៅ ៣ សប្តាហ៍ ឬច្រើនជាងនេះ ដើម្បីជាសះស្បើយ។ ការព្យាបាលរួមមានថ្នាំបន្តក់ភ្នែក ឬថ្នាំក្រែមដាក់ភ្នែក ការឱ្យថ្នាំបន្តក់ឬក្រែម ជួយបន្ថយរយៈពេលនៃការឆ្លង កាត់បន្ថយផលវិបាក និងកាត់បន្ថយការរីករាលដាលដល់អ្នកដទៃ។

នាយកដ្ឋានប្រយុទ្ធនឹងជំងឺឆ្លង ណែនាំបងប្អូនប្រជាពលរដ្ឋទៅពិគ្រោះជំងឺជាមួយគ្រូពេទ្យជំនាញ និងរាយការណ៍ជាបន្ទាន់បើឃើញកើតជាច្រើនក្នុងកន្លែងធ្វើការ សាលារៀន ក្នុងសហគមន៍។ ព័ត៌មានបន្ថែមសូមទាក់ទងលេខ ១១៥៕ ដោយ ៖ វ៉ន ដារា