ភ្នំពេញ៖ ឧត្តមសេនីយ៍ទោ សេង ធារិន មេបញ្ជាការរង នាយសេនាធិការយោធភូមិភាគទី៥ បានឲ្យដឹងថា កម្លាំង កងទ័ពនៃយោធភូមិភាគទី៥ជិតពីរពាន់នាក់ បានត្រៀមខ្លួនគ្រប់ពេលវេលាទាំងអស់ ដើម្បីអន្តរាគមន៍ជួយ ដល់បងប្អូនប្រជាពលរដ្ឋ ពេលជួបបញ្ហាគ្រោះមហន្តរាយនានា ដែលកើតឡើងជាយថាហេតុណាមួយ។

 ថ្លែងប្រាប់ទូរទស្សន៍ BTV តាមរយៈកិច្ចសម្ភាសន៍នាព្រឹកថ្ងៃទី២៥ ខែកញ្ញា ឆ្នាំ២០២៣នេះ ឧត្តម សេនីយ៍ទោ សេង ធារិន បានបញ្ជាក់ថា ស្របតាមកំណែទម្រង់របស់រាជរដ្ឋាភិបាល ក៏ដូចជាក្រសួងការពារជាតិ កម្លាំងយោធានៃយោធភូមិភាគទី៥ បានធ្វើការហ្វឹកហាត់ជាប្រចាំ លើជំនាញសង្រ្គោះបន្ទាន់ ដើម្បីជួយដល់បងប្អូនប្រជាពរដ្ឋឲ្យបានទាន់ពេលវេលាពេលដែលជួបគ្រោះធម្មជាតិ ដូចជាករណីខ្យល់កន្រ្តាក់ និងទឹកជំនន់ជាដើម។

​លោកឧត្តមសេនីយ៍ បានបញ្ជាក់ផងដែរថា កងកម្លាំងយោធានៃយោធភូមិភាគទី៥ គ្មានការរុញរា នោះឡើយក្នុងការអន្តរាគមន៍ជួយសង្រ្គោះប្រជាជនពេលជួបបញ្ហា មិនថាយប់ ឬថ្ងៃនោះទេ ជាក់ស្តែងដូច សកម្មភាពអ្វីដែលក្រុមការងាររបស់លោកបានធ្វើនាពេលកន្លងមកយ៉ាងដូច្នេះដែរ ដោយការចុះជួយពល រដ្ឋរងគ្រោះនេះអស់ពីកម្លាំងកាយចិត្ត គ្មានការអល់អែកនោះឡើយ។

លោកឧត្តមសេនីយ៍ ក៏បានបញ្ជាក់ផងដែរថា ក្រៅពីការត្រៀមកម្លាំងសម្រាប់អន្តរាគមន៍ជួយដល់ បងប្អូនប្រជាពលរដ្ឋនោះ យោធភូមិភាគទី៥ក៏មានសម្ភារៈ និងឧបករណ៍គ្រប់គ្រាន់សម្រាប់ជួយសង្រ្គោះបងប្អូនប្រជាពលរដ្ឋឲ្យបានទាន់ពេលវេលាផងដែរ ដោយសម្ភារៈទាំងនោះគឺមាននៅទំាងបួនខេត្តដែលចំណុះឲ្យយោធភូមិភាគតែម្តង៕ អត្ថបទ៖ បាន ចក់