ភ្នំពេញ ៖ ខណៈរដូវវស្សាខិតជិតមកដល់នោះ ក្រសួងការពារជាតិកម្ពុជាបានត្រៀមឧបករណ៍ដូចជាឧទ្ធម្ភាគចក្រ នាវា អូប៊រ រថយន្តធន់ធ្ងន់ និងរថយន្តសង្រ្គោះបន្ទាន់រួចជាស្រេច ដើម្បីអន្តរាគមន៍ជួយដល់បងប្អូនប្រជាពលរដ្ឋខ្មែរ ដែលជួបបញ្ហាគ្រោះធម្មជាតិដែលកើតចេញជាយថាហេតុណាមួយនោះ។

 នាយឧត្តមសេនីយ៍ ម៉ឹង សំផន រដ្ឋលេខាធិការក្រសួងការពារជាតិ អនុប្រធានគណៈកម្មាធិការជាតិគ្រប់គ្រងគ្រោះមហន្តរាយ និងជាប្រធានគណៈកម្មាការជួយសង្គ្រោះគ្រោះមហន្តរាយ ក្រសួងការពារជាតិ បានបើកកិច្ចប្រជុំមួយនាថ្ងៃទី៣១ ខែឧសភា ឆ្នាំ២០២១នេះ ដើម្បីត្រៀមបំរុងការឆ្លើយតបគ្រោះមហន្តរាយរបស់ក្រសួងការពារជាតិ នៅក្នុងរដូវវស្សា បានថ្លែងឲ្យដឹងថា រាជរដ្ឋាភិបាលកម្ពុជាបានគិតគូរយកចិត្តទុកដាក់ដល់ការជួយសង្គ្រោះគ្រោះមហន្តរាយផ្សេងៗ ដែលកើតឡើងជាយថាហេតុណាមួយនាពេលខាងមុខនេះដល់បងប្អូនប្រជាពលរដ្ឋខ្មែរនៅទូទាំងប្រទេស។

ឯកឧត្តមនាយឧត្តមសេនីយ៍បានលើកឡើងទៀតថា គណៈកម្មាការជួយសង្គ្រោះគ្រោះមហន្តរាយ ក្រសួងការពារជាតិ បានត្រៀមលក្ខណៈ ទាំងកម្លាំង មធ្យោបាយ ឧបករណ៍ និង សម្ភារៈផ្សេងៗទៀតដែលក្រសួងការពារជាតិមាន ដើម្បីត្រៀមលក្ខណៈចុះជួយប្រជាពលរដ្ឋអោយទាន់ពេលវេលានោះ។

នៅក្នុងកិច្ចប្រជុំនោះនាយឧត្តមសេនីយ៍ម៉ឹង សំផនជំរុញដល់ បណ្តាអង្គភាពពាក់ព័ន្ធ និង ការងារសង្គ្រោះគ្រោះមហន្តរាយទាំងអស់ ត្រូវពិនិត្យឧបករណ៍ សម្ភារៈប្រើប្រាស់ ដែលមានឲ្យបានត្រឹមត្រូវ ដូចជា«ឧទ្ធម្ភាគចក្រ នាវា អូប៊រ រថយន្តដឹកជញ្ជូន រថយន្តសង្គ្រោះ និងមធ្យោបាយផ្សេងៗទៀត និងត្រូវបែងចែកកម្លាំងប្រចាំការជាប់ជាប្រចាំ ដើម្បីចុះជួយសង្រ្គោះប្រជាពមរដ្ឋ អោយបានទាន់ពេលវេលានៅពេលមានគ្រោះធម្មជាតិកើតឡើងជា យកថាហេតុ»។

នៅក្នុងកិច្ចប្រជុំឱកាសនោះដែល បណ្តាលអង្គភាពជំនាញដែលមានការពាក់ពន្ធ័ បានរាយការណ៍ជូនអង្គប្រជុំអំពីការត្រៀមលក្ខណៈរបស់ខ្លួនទាំងកំលាំង និង មធ្យោបាយសំភារៈដែលខ្លួនមាន ព្រមទាំងបានធ្វើការហ្វឹកហ្វឺនថែមទៀត ក្នុងការត្រៀមលក្ខណៈជួយសង្ក្រោះគ្រោះមហន្តរាយក្នុងឆ្នាំនេះ។

នៅក្នុងកិច្ចប្រជុំនោះដែរ ឯកឧត្តម ម៉ឹង សំផន បានរំពឹងថា គ្រប់បណ្តាលអង្គភាពជំនាញរបស់ កងយោធពលខេមរភូមិន្ទ ដែលមានការពាក់ពន្ធ័ទាំងអស់ នឹងត្រៀមខ្លួនអនុវត្តនូវភារកិច្ចជួយសង្រ្គោះគ្រោះមហន្តរាយនៅក្នុងរដូវវស្សាឆ្នាំ ២០២១នេះឲ្យសំរេចបានលទ្ធផលល្អតាមការណែនាំរបស់រាជរដ្ឋភិបាល ប្រកបដោយប្រសិទ្ធភាព និងការទទួលខុសត្រូវខ្ពស់បំផុតផងដែរ៕អត្ថបទ ៖ ចក់