ក្រសួងបរិស្ថានរបស់ប្រទេសជប៉ុន និយាយថា សារធាតុទ្រីចូមនៅក្នុងទឹកសមុទ្របង្ហូរចេញពីរោងចក្រថាមពលនុយក្លេអ៊ែរ Fukushima Daiichi ដែលមិនដំណើរការ នៅតែទាបក្រោមកម្រិតដែលអាចរកឃើញ។ ក្រសួងនៅថ្ងៃចន្ទនេះ បានប្រកាសលទ្ធផលនៃការវាស់ស្ទង់ប្រចាំសប្តាហ៍លើកទីប្រាំរបស់ខ្លួនលើគំរូទឹក។ មន្ត្រីក្រសួង បាននឹងកំពុងធ្វើការវាស់ស្ទង់ ចាប់តាំងពីក្រុមហ៊ុនថាមពលអគ្គិសនីទីក្រុងតូក្យូ បានចាប់ផ្តើមបញ្ចេញទឹកដែលបានធ្វើប្រព្រឹត្តិកម្មនិងពង្រាវរួចពីរោងចក្រចូលទៅក្នុងមហាសមុទ្រកាលពីថ្ងៃទី២៤ ខែសីហា។

គំរូនៅក្នុងការវាស់ស្ទង់ចុងក្រោយ ត្រូវបានប្រមូលកាលពីថ្ងៃអង្គារសប្តាហ៍មុនពី ១១ ចំណុចនៅឆ្នេរសមុទ្រនៃខេត្ត Fukushima រួមទាំងកន្លែងនៅជិតទីតាំងបញ្ចេញទឹកសំណល់ និងទីតាំងដែលមានចម្ងាយប្រហែល ៥០ គីឡូម៉ែត្រ។

ក្រសួងបាននិយាយថា កំហាប់នៃសារធាតុទ្រីចូម នៅគ្រប់ទីតាំងទាំងអស់គឺទាបជាងក្រោមកម្រិតអប្បបរមាដែលអាចរកឃើញ គឺ ១០ becquerels នៃខ្នាតវិទ្យុសកម្មក្នុងមួយលីត្រ។ សារធាតុ ទ្រីចូម ក៏ស្ថិតនៅក្រោមកម្រិតដែលអាចរកឃើញនៅក្នុងការវាស់ស្ទង់ចំនួនបួនកាលពីពេលមុន។ ក្រសួងមានផែនការបន្ត ត្រួតពិនិត្យកម្រិត ទ្រីចូម ម្តងក្នុងមួយសប្តាហ៍សម្រាប់ពេលនេះ។ លទ្ធផលនឹងត្រូវបានផ្សព្វផ្សាយនៅលើគេហទំព័រ និងប្រព័ន្ធផ្សព្វផ្សាយសង្គមរបស់ខ្លួន។

មុនពេលបញ្ចេញទឹកដែលបានធ្វើប្រព្រឹត្តិកម្មរួចចូលទៅក្នុងសមុទ្រ ប្រតិបត្តិកររបស់រោងចក្របានពង្រាវដើម្បីកាត់បន្ថយកម្រិតសារធាតុទ្រីចូមមកត្រឹមប្រហែលមួយភាគប្រាំពីរនៃគោលការណ៍ណែនាំរបស់អង្គការសុខភាពពិភពលោកសម្រាប់ទឹកទទួលទាន។