ដោយនៅសល់រយៈពេល ២ខែទៀតដល់កិច្ចប្រជុំកំពូល COP28 របស់អង្គការសហប្រជាជាតិ បណ្តាប្រទេសនានានៅឆ្ងាយណាស់ពីការតភ្ជាប់គម្លាត រវាងប្រទេសដែលទាមទារឲ្យមានកិច្ចព្រមព្រៀងកាត់បន្ថយការប្រើប្រាស់ឥន្ធនៈហ្វូស៊ីល ដែលធ្វើឲ្យឡើងកម្ដៅផែនដី និងប្រទេសដែលទទូចបន្តរក្សាទុកមុខងារធ្យូងថ្ម ប្រេង និងឧស្ម័នធម្មជាតិដដែល។

សន្និសីទស្ដីពីអាកាសធាតុ COP28 នៅទីក្រុងឌូបៃ ប្រទេសអារ៉ាប់រួម ដែលគ្រោងធ្វើឡើង នៅចន្លោះថ្ងៃទី៣០ ខែវិច្ឆិកា ដល់ថ្ងៃទី១២ ខែធ្នូ ត្រូវបានគេមើលឃើញថា ជាឱកាសដ៏សំខាន់ សម្រាប់រដ្ឋាភិបាលនានា ក្នុងការពន្លឿនសកម្មភាព ដើម្បីកាត់បន្ថយការឡើងកម្ដៅផែនដី តែយ៉ាងណាក្ដី បណ្តាប្រទេសទាំងនោះ នៅតែមានការខ្វែងគំនិតគ្នាអំពីអនាគតនៃឥន្ធនៈហ្វូស៊ីល ជាការដុត ដែលជាមូលហេតុចម្បងនាំឲ្យមានបម្រែបម្រួលអាកាសធាតុ។

កិច្ចប្រជុំ នៅឯមហាសន្និបាតអង្គការសហប្រជាជាតិ (UNGA) កាលពីសប្តាហ៍មុន បានធ្វើឲ្យមានការជជែកដេញដោលគ្នាឡើងវិញលើបញ្ហា ដែលចាក់ឫសមកយ៉ាងយូរ ដោយប្រទេស ដែលងាយរងគ្រោះពីអាកាសធាតុដូចជាប្រជុំកោះ Marshall ជាដើម បានស្នើសុំឲ្យប្រទេសអ្នកមានឈប់បញ្ចេញឥន្ធនៈបង្កកង្វក់ និងវិនិយោគលើជម្រើសនានា ដែលអាចកកើតឡើងវិញបាន។

ក្នុងកិច្ចប្រជុំកំពូលស្ដីពីអាកាសធាតុរយៈពេលមួយថ្ងៃ ដែលធ្វើឡើងរួមជាមួយមហាសន្និបាតរបស់អង្គការសហប្រជាជាតិ ដោយពោលទាំងក្រៀមក្រំ ចំពោះ «ភាពលោភលន់ឥតអៀនខ្មាស» នៃការយកផលប្រយោជន៍ពីឥន្ធនៈហ្វូស៊ីលនោះ អគ្គលេខាធិការអង្គការសហប្រជាជាតិ លោក Antonio Guterres បាននិយាយថា «មនុស្សជាតិ បាន និងកំពុងបើកផ្លូវទៅកាន់ឋាននរក» ដោយការធ្វើឲ្យផែនដីឡើងកម្ដៅ៕