រុស្ស៊ី ៖ រុស្ស៊ីបានប្រាប់នាយករដ្ឋមន្ត្រីអាមេនី លោក Nikol Pashinyan កាលពីថ្ងៃច័ន្ទ (២៥ កញ្ញា) ថា អាមេនីត្រូវបន្ទោសខ្លួនឯង ចំពោះជ័យជម្នះរបស់ប្រទេសអាស៊ែបៃហ្សង់ លើតំបន់ណាហ្គ័រណូ-ការ៉ាបាក់ ដោយសារតែលោក Pashinyan បានទទូចចង់បង្កើនភាពជិតស្និទ្ធជាមួយលោកខាងលិច ជាជាងធ្វើការជាមួយទីក្រុងមូស្គូ និងបាគូដើម្បីសន្តិភាព។

លោក Pashinyan បាននិយាយនៅក្នុងសុន្ទរកថាទៅកាន់រុស្ស៊ីកាលពីថ្ងៃអាទិត្យ (២៤ កញ្ញា) ថា រុស្ស៊ីធ្វើឲ្យអាមេនីខកចិត្ត ដោយការមិនផ្តល់ជំនួយបន្ថែមទៀតដើម្បីបញ្ចៀសវិបត្តិជុំវិញតំបន់បំបែក ដោយបន្ថែមថា លោកនឹងត្រូវផ្លាស់ប្តូរសម្ព័ន្ធភាពសន្តិសុខរបស់អាមេនី។ 

ក្រសួងការបរទេសរុស្ស៊ីវាយបកវិញ ជាមួយនឹងការវាយប្រហារដោយពាក្យសម្តីយ៉ាងខ្លាំងលើការលើកឡើងរបស់នាយករដ្ឋមន្ត្រីអាមេនីរូបនេះ។ ក្រសួងការបរទេសរុស្ស៊ីនិយាយថា «យើងជឿជាក់ថា ភាពជាអ្នកដឹកនាំរបស់រដ្ឋធានីយ៉េរ៉េវ៉ាន់ កំពុងធ្វើកំហុសដ៏ធំមួយដោយចេតនា ដើម្បីបំផ្លាញទំនាក់ទំនងពហុភាគី និងជាច្រើនសតវត្សរបស់អាមេនីជាមួយរុស្ស៊ី ខណៈពេលដែលធ្វើឱ្យប្រទេសនេះ ក្លាយជាចំណាប់ខ្មាំងនៃល្បែងភូមិសាស្ត្រនយោបាយរបស់លោកខាងលិចទៅវិញ»។

គួររម្លឹកផងដែរថា អាស៊ែបៃហ្សង់បានដណ្ដើមយកទីក្រុង ការ៉ាបាក់ នៅក្នុងការវាយលុកមួយកាលពីសប្តាហ៍មុន ដោយបានបញ្ជូនជនជាតិអាមេនីរាប់ពាន់នាក់ ភៀសខ្លួនចូលទៅក្នុងប្រទេសអាមេនី។ 

រដ្ឋធានីបាគូបានសន្យាថា នឹងការពារសិទ្ធិរបស់ជនជាតិអាមេនីប្រហែល១២០០.០០នាក់ ដែលជ្រកកោននៅទីក្រុងការ៉ាបាក់ ប៉ុន្តែមនុស្សជាច្រើនបដិសេធមិនទទួលយកការធានារបស់អាស៊ែបៃហ្សង់នេះឡើយ៕