រុស្ស៊ី ៖ ទីក្រុងម៉ូស្គូ និងវ៉ាស៊ីនតោន បានចោទប្រកាន់គ្នាទៅវិញទៅមកថា បានធ្វើឲ្យមានអស្ថិរភាព នៅតំបន់កូកាស ខាងត្បូង ខណៈដែលជនជាតិអាមេនីរាប់ពាន់នាក់បានភៀសខ្លួនចេញពីលំនៅឋានរបស់ពួកគេ នៅតំបន់ណាហ្គ័រណូ-ការ៉ាបាក់ (Nagorno-Karabakh) ដោយសារភ័យខ្លាចថា មានការបោសសម្អាតជនជាតិភាគតិច នៅតំបន់នេះ។

ទោះបីជាអាមេនីបានពឹងផ្អែកលើភាពជាដៃគូសន្តិសុខជាមួយរុស្ស៊ី ចាប់តាំងពីការដួលរលំសហភាពសូវៀតក៏ដោយ ក៏ទំនាក់ទំនងរបស់ប្រទេសទាំង២ បានធ្លាក់ចុះយ៉ាងខ្លាំង បន្ទាប់ពីប្រធានាធិបតីរុស្ស៊ី លោក វ្ល៉ាឌីមៀរ ពូទីន បានបើកការលុកលុយលើអ៊ុយក្រែន នៅដើមឆ្នាំ២០២២។

តាមរយៈកម្មវិធីផ្ញើសារ Telegram ឯកអគ្គរដ្ឋទូតរុស្ស៊ីប្រចាំនៅសហរដ្ឋអាមេរិក លោក Anatoly Antonov បានលើកឡើងថា៖ «យើងជំរុញឲ្យទីក្រុងវ៉ាស៊ីនតោនចៀសវាងកុំប្រើពាក្យសម្ដី និងសកម្មភាពដ៏គ្រោះថ្នាក់បំផុត ដែលនាំទៅរកការកើនឡើងនៃរឿងក្លែងក្លាយ ក្នុងទស្សនៈប្រឆាំងរុស្ស៊ី នៅប្រទេសអាមេនី»។

ការអត្ថាធិប្បាយរបស់លោក Antonov នៅថ្ងៃអង្គារ (ទី២៦ ខែកញ្ញា) នេះ បានកើតមានឡើងបន្ទាប់ពីមានការលើកឡើង កាលពីថ្ងៃមុន ពីសំណាក់អ្នកនាំពាក្យរបស់ក្រសួងការបរទេសសហរដ្ឋអាមេរិក បន្ទាប់ពីអាមេនីបានស្តីបន្ទោសទីក្រុងម៉ូស្គូ ចំពោះការមិនបានចូលធ្វើអន្តរាគមន៍ ក្នុងការចូលមកដណ្ដើមយកតំបន់ណាហ្គ័រណូ-ការ៉ាបាក់ កាលពីសប្តាហ៍មុនដោយកងកម្លាំងរបស់អាស៊ែបៃហ្សង់។

អ្នកនាំពាក្យក្រសួងការបរទេសអាមេរិក លោក Matthew Miller បានប្រាប់សារព័ត៌មានថា៖ «ខ្ញុំគិតថា រុស្ស៊ី បានបង្ហាញឲ្យឃើញថា ខ្លួនមិនមែនជាដៃគូសន្តិសុខ ដែលអាចទុកចិត្តបាននោះឡើយ»៕