ខណៈពលរដ្ឋអាមេនី រាប់ពាន់នាក់បានភៀសខ្លួនចេញពីលំនៅឋានរបស់ពួកគេនៅតំបន់ ណាហ្គ័ណូ-ការ៉ាបាក់ (Nagorno-Karabakh) ដោយនិយាយថាពួកគេខ្លាចការបោសសម្អាតជនជាតិភាគតិច នោះសហរដ្ឋអាមេរិកកាលពីថ្ងៃចន្ទ បានអំពាវនាវឱ្យប្រទេសអាស៊ែរបៃហ្សង់ការពារសិទ្ធិរបស់ជនស៊ីវិល និងអនុញ្ញាតឱ្យមានបេសកកម្មមនុស្សធម៌ និងការត្រួតពិនិត្យ។ ប្រធានទីភ្នាក់ងារសហរដ្ឋអាមេរិក សម្រាប់ការអភិវឌ្ឍន៍អន្តរជាតិ (USAID) លោកស្រី Samantha Power បានប្រាប់អ្នកសារព័ត៌មាននៅទីក្រុង Yerevan ថា យើងកំពុងអំពាវនាវឱ្យប្រទេសអាស៊ែរបៃហ្សង់ រក្សាបទឈប់បាញ់ និងមានចំណាត់ការជាក់ស្តែងដើម្បីការពារសិទ្ធិជនស៊ីវិលនៅតំបន់ Nagorno-Karabakh។

លោកស្រី Power ដែលកាលពីថ្ងៃច័ន្ទបានប្រគល់លិខិតគាំទ្រមួយច្បាប់ដល់នាយករដ្ឋមន្ត្រីអាមេនី លោក Nikol Pashinyan ពីប្រធានាធិបតីសហរដ្ឋអាមេរិក លោក Joe Biden ដែលបាននិយាយថា ការប្រើប្រាស់កម្លាំងរបស់ប្រទេសអាស៊ែរបៃហ្សង់ គឺមិនអាចទទួលយកបានទេ ហើយទីក្រុងវ៉ាស៊ីនតោន កំពុងសំឡឹងមើលការឆ្លើយតបដ៏សមស្របណាមួយ។ លោកស្រី បានអំពាវនាវដល់ប្រធានាធិបតី អាស៊ែរបៃហ្សង់ លោក Ilham Aliyev ឱ្យធ្វើតាមការសន្យារបស់លោកដើម្បីការពារសិទ្ធិជនជាតិភាគតិចអាមេនី បើកឡើងវិញច្រករបៀងទីក្រុង Lachin ទាំងស្រុង ដែលតភ្ជាប់តំបន់នេះទៅប្រទេសអាមេនី និងអនុញ្ញាតឱ្យមានការចែកចាយជំនួយ និងបេសកកម្មត្រួតពិនិត្យអន្តរជាតិ។ យ៉ាងហោចណាស់ ជនជាតិភាគតិចអាមេនី ១៣.៥៥០នាក់ ក្នុងចំណោម ១២០.០០០ ដែលមានលំនៅឋាននៅតំបន់ Nagorno-Karabakh បានមកដល់ប្រទេសអាមេនី នៅថ្ងៃដំបូងនៃការចាកចេញ ដោយមានរថយន្ត និងរថយន្តក្រុងរាប់រយគ្រឿងបានមកកកកុញជាមួយអីវ៉ាន់ ដែលធ្វើដំណើរតាមបណ្តោយផ្លូវតំបន់ភ្នំចេញពីប្រទេសអាស៊ែរបៃហ្សង់។