ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ មានកិច្ចសហការ និងគាំទ្រពីសហភាពអឺរ៉ុប (EU) បានជួយលើកកម្ពស់ជីវភាព របស់ពលរដ្ឋកំពុងរស់នៅតំបន់បឹងទន្លេសាប តាមរយៈកម្មវិធី CAPFISH ដែលអនុវត្តដោយអង្គការ Oxfam ទទួលថវិកា៤លានអឺរ៉ូ (២០២១-២០២៤), អង្គការសមាគមអភិរក្សសត្វព្រៃ ទទួលថវិកា ៤,៩លានអឺរ៉ូ (២០២១-២០២៤) និងអង្គការ Save the Children ទទូលថវិកា៤លានអឺរ៉ូ (២០២១-២០២៥) ។

ក្នុងនោះមានគម្រោង “សហគមន៍នេសាទ” បានបង្កើតការងារជាសេដ្ឋកិច្ចវិលជុំ នៅបឹងទន្លេសាបខាងលិចតំបន់១ ជួយកុមារជិត៦ពាន់នាក់, បង្កើតក្រុមសេដ្ឋកិច្ចបៃតងចំនួន១៤ ជាប្រយោជន៍ដល់ប្រជាពលរដ្ឋជាង១ ៧០០គ្រួសារ, បង្កើតបណ្តាញអេកូទេសចរណ៍ធម្មជាតិបឹងទន្លេសាប ជួយសហគមន៍នេសាទបង្កើនប្រាក់ចំណូលបន្ថែម, គម្រោង “ទន្លេសាបយើង” ជួយកាត់បន្ថយការនេសាទខុសច្បាប់ ចូលរួមអនុវត្តដំណោះស្រាយល្បាត ដោយប្រើប្រាស់បច្ចេកវិទ្យាអភិរក្សមានកម្មវិធី SMART សម្រាប់ល្បាត និងការរាយការណ៍ ការចូលរួមក្នុងសកម្មភាពបន្សាំអាកាសធាតុដូចជា វេទិកាស្រូវប្រកបដោយនិរន្តរភាព ការគ្រប់គ្រងភ្លើងព្រៃ និងការដាំដើមឈើឡើងវិញ និងគម្រោង “បង្កើតបរិស្ថាន” ដែលមានភាពស៊ាំ និងលើកកម្ពស់ការអភិវឌ្ឍសេដ្ឋកិច្ចសង្គម នៅតំបន់ភាគខាងកើតទន្លេសាប បានបង្កើននូវលទ្ធភាពដល់សហគមន៍ជាង៦០០គ្រួសារ ក្នុងការទទួលបានទឹកស្អាត និងអនាម័យ និងសម្ភារសិក្សាសម្រាប់សិស្ស ។

ក្នុងសេចក្តីប្រកាសព័ត៌មានរបស់អង្គការ Oxfam នាថ្ងៃទី២៦ ខែកញ្ញានេះ បានឲ្យដឹងថា មន្ត្រីក្រសួងកសិកម្ម មន្ត្រី EU ប្រចាំកម្ពុជា និងគណៈកម្មការតម្រង់ទិសកម្មវិធីជំរុញកំណើនវិស័យជលផលប្រកបដោយចីរភាព និងបរិយាបន្ន បានធ្វើទស្សនកិច្ចនៅតំបន់បឹងទន្លេសាបកាលពីថ្ងៃទី២០ដល់២២ ខែកញ្ញា បានឃើញពីការរីកចម្រើនរបស់គម្រោងនាពេលថ្មីៗ ទាក់ទិននឹងផ្នែកអប់រំ ការអភិរក្ស និងការលើកកម្ពស់នូវជីវភាពរស់នៅរបស់សហគមន៍ តាមរយៈកម្មវិធី CAPFISH ។ ជួបជាមួយសហគមន៍ សិស្សានុសិស្សថ្នាក់មត្តេយ្យ បឋម និងមធ្យមសិក្សា និងរដ្ឋបាលថ្នាក់តំបន់នៅភូមិថ្នល់ឈើទាល និងតំបន់រ៉ាមសារព្រែកទាល់ ជារមណីយដ្ឋានដ៏មានសារសំខាន់ នៅតំបន់ឋបនីយជីវមណ្ឌលបឹងទន្លេសាប ដើម្បីស្វែងយល់ពីកម្មវិធី និងអត្ថប្រយោជន៍របស់កម្មវិធីដល់សហគមន៍ និងឃើញពីផលជាវិជ្ជមាន នៃកម្មវិធីទៅលើការអភិរក្សធនធានធម្មជាតិ និងការចិញ្ចឹមជីវិតរបស់សហគមន៍ ។

លោក Koen EVERAERT អនុប្រធានកិច្ចសហប្រតិបត្តិការ EU ប្រចាំកម្ពុជា លើកឡើងថា កម្មវិធី EU CAPFISH នៅតែប្តេជ្ញាធ្វើការជាមួយក្រសួងកសិកម្ម និងអង្គការដៃគូ ដើម្បីគាំទ្រដល់ការអភិវឌ្ឍប្រកបដោយចីរភាពនៅក្នុងវិស័យជលផល និងការអភិរក្សបរិស្ថាន នៅកម្ពុជា ហើយគម្រោងដែលផ្តល់មូលនិធិដោយ EU នៅបឹងទន្លេសាប ធ្វើជាគំរូដល់ចក្ខុវិស័យរួម ក្នុងការលើកកម្ពស់ការអនុវត្តល្អ ការការពារប្រព័ន្ធអេកូឡូស៊ី និងការកែលម្អជីវភាពរបស់សហគមន៍មូលដ្ឋាន ។

ឯកឧត្តម ឃុន សាវឿន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បាន កោតសរសើរ ដល់កិច្ចខិតខំប្រឹងប្រែងរួមគ្នា របស់អ្នកពាក់ព័ន្ធ ហើយបានបង្ហាញការប្តេជ្ញាចិត្តរបស់ក្រសួង ក្នុងការធ្វើការរួមគ្នាដោះស្រាយបញ្ហានៅតំបន់បឹងទន្លេសាប និងសូមថ្លែងអំណរគុណ ចំពោះសហភាពអឺរ៉ុប សម្រាប់ការគាំទ្រដល់កម្មវិធីការអភិវឌ្ឍ វិស័យជលផល នៅកម្ពុជាដ៏ធំនេះ ។

គួរបញ្ជាក់ថា កម្មវិធី CAPFISH បានជួយពង្រឹងសហគមន៍នេសាទនៅក្នុងខេត្តចំនួន១០ ជាប់បឹងទន្លេសាប និងតាមនៅបណ្តោយឆ្នេរ កម្មវិធីនេះផ្តោតលើការនេសាទ ប្រកបដោយចីរភាព ការអប់រំ ការទទួលបានទឹកស្អាត និងអនាម័យ ហើយកម្មវិធី CAPFISH ផ្តោតលើការអភិវឌ្ឍប្រកបដោយភាពធន និងបរិយាបន្នក្នុងវិស័យជលផលនៅកម្ពុជា ៕ អត្ថបទ ៖ បាន សុខរិទ្ធិ