វៀតណាម៖ ប្រទេសវៀតណាមសង្ឃឹមថា នឹងទប់ស្កាត់បាននូវការផ្ទុះរាលដាលថ្មីនៃជំងឺ COVID-19 ដោយការចាប់ផ្ដើមធ្វើតេស្តទ្រង់ទ្រាយធំ ទៅលើក្រុមមនុស្សមានការប្រឈមខ្លាំងនៅក្នុងទីក្រុង Ho Chi Minh និងបានដាក់ចេញនូវវិធានការគម្លាតសុវត្ថិភាពថ្មីបន្ថែមទៀត។
កិច្ចខិតខំប្រឹងប្រែងនេះធ្វើឡើង ដើម្បីឆ្លើយតបទៅនឹងការឆ្លងជាក្រុមថ្មី ទាក់ទងនឹងពិធីកម្មខាងសាសនា។ ប្រទេសវៀតណាមធ្លាប់ទទួលបានជោគជ័យ ក្នុងការគ្រប់គ្រងការឆ្លងរាលដាលវីរុសនេះ ប៉ុន្តែករណីឆ្លងជាច្រើនបានកំពុងហក់ឡើងខ្ពស់ជាថ្មី កាលពីសប្ដាហ៍កន្លងទៅ។ កាលពីចុងសប្ដាហ៍កន្លងទៅ ក្រុមមន្ត្រីបានព្រមានពីការផ្ទុះឡើងនៃវីរុសបម្លែងខ្លួនថ្មីដ៏គ្រោះថ្នាក់ ដែលបានរកឃើញនៅក្នុងប្រទេសនេះ។ រដ្ឋាភិបាលនិយាយថា ករណីឆ្លងវីរុសបម្លែងខ្លួនថ្មីលាយបញ្ចូលគ្នានៃហ្សែន របស់វីរុសដែលត្រូវបានរកឃើញនៅក្នុងប្រទេសឥណ្ឌា និងចក្រភពអង់គ្លេសគឺងាយឆ្លងតាមខ្យល់។
សរុបមក ប្រទេសនេះទើបតែបានកត់ត្រាករណីឆ្លងជាង ៧ពាន់នាក់ និងស្លាប់ ៤៧នាក់ប៉ុណ្ណោះ ប៉ុន្តែចំនួនឆ្លងកើនឡើងចុងក្រោយមានច្រើនជាងពាក់កណ្ដាល នៃចំនួនករណីឆ្លងសរុប។ ការផ្ទុះរាលដាលចុងក្រោយបំផុតនៅក្នុងទីក្រុង Ho Chi Minh គឺដោយសារតែពិធីកម្មសាសនាគ្រិស្ត ដែលគេបានមើលឃើញមានករណីវិជ្ជមានយ៉ាងហោចណាស់ ១២៥នាក់ជាចំនួនច្រើនបំផុតនៃការឆ្លងនៅក្នុងទីក្រុងនេះ។ បច្ចុប្បន្នក្រុមមន្ត្រីគ្រោងនឹងធ្វើតេស្តរកវីរុសនេះចំនួន ១សែននាក់ក្នុង ១ថ្ងៃ ដោយផ្ដោតលើក្រុមមនុស្សដែលត្រូវគេគិតថា មានការប្រឈមនៃការឆ្លងខ្ពស់៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
