បើតាមប្រភពចំនួន៣ ដែលបានប្រាប់មកសារព័ត៌មាន Reuters បានឲ្យដឹងថា Pegatron ដែលជាក្រុមហ៊ុនផ្គត់ផ្គង់របស់ក្រុមហ៊ុន Apple នៅថ្ងៃអង្គារ (ទី២៦ ខែកញ្ញា) នេះ បានប្រាប់បុគ្គលិករោងចក្ររបស់ខ្លួនកុំឲ្យទៅធ្វើការងារ ដោយបញ្ឈប់ការដំឡើង iPhone ក្នុងរយៈពេល ២ថ្ងៃជាប់គ្នា នៅរោងចក្រភាគខាងត្បូងប្រទេសឥណ្ឌា ជាកន្លែង ដែលអគ្គិភ័យបានឆាបឆេះ កាលពីថ្ងៃអាទិត្យចុងសប្ដាហ៍កន្លងមក។

ប្រភពទាំងនោះ ដែលដឹងពីបញ្ហានេះ បាននិយាយថា គេមិនបានប្រាប់កម្មករពីមូលហេតុនៃការបញ្ឈប់ការងារនេះនោះទេ។ ប្រភពចំនួន២ បាននិយាយថា ក្រុមហ៊ុនតៃវ៉ាន់បានបញ្ឈប់គ្រប់វេនទាំងអស់ កាលពីថ្ងៃចន្ទ (ទី២៥ ខែកញ្ញា) នៅរោងចក្រ ជិតទីក្រុង Chennai ក្នុងរដ្ឋ Tamil Nadu បន្ទាប់ពីមានឧបទ្ទវហេតុអគ្គិភ័យ។ បើតាមនាយកដ្ឋានឆ្លើយតបគ្រាអាសន្ន បានឲ្យដឹងថា ភ្លើងត្រូវបានពន្លត់ តាំងពីពេលនោះមក ។

យ៉ាងណាក្ដី នៅមុននេះ ក្រុម Pegatron បានប្រាប់ថា ឧបទ្ទវហេតុនេះ «មិនមានផលប៉ះពាល់ផ្នែកហិរញ្ញវត្ថុ ឬប្រតិបត្តិការសំខាន់ៗ» របស់ក្រុមហ៊ុននោះទេ។ តែប្រភពឧស្សាហកម្មមួយបានប្រាប់ថា ទោះបីរោងចក្រនេះមានសមត្ថភាពផលិតទូរស័ព្ទ iPhone ប្រហែល ២៦.០០០គ្រឿង ក្នុងមួយថ្ងៃក៏ដោយ ក៏ក្នុងរយៈពេលប៉ុន្មានខែថ្មីៗនេះ រោងចក្រ បាន និងកំពុងដំឡើង iPhone បានប្រហែល ៨.០០០គ្រឿង ទៅ ១២.០០០គ្រឿងប៉ុណ្ណោះ ក្នុងមួយថ្ងៃ។

ក្រុម Pegatron បានបដិសេធមិនធ្វើអត្ថាធិប្បាយអ្វីនោះឡើយ ជុំវិញការប៉ាន់ស្មានចំនួនផលិតកម្មនេះ ហើយក្រុមហ៊ុន Apple ក៏មិនបានឆ្លើយតបនឹងសំណើសុំការអត្ថាធិប្បាយនោះដែរ៕