បាល់ទាត់៖ លោក Oleg Starynskyi គ្រូបង្វឹកក្លិបភ្នំពេញក្រោន បានត្រៀមខ្លួនជាស្រេចក្នុងការចូលរួមប្រកួតពានរង្វាន់ League Cup 2021 ដែលរៀបចំដោយគណៈកម្មការប្រកួតបាល់ទាត់ជាតិកម្ពុជា-CNCC ក្នុងខែមិថុនានេះ ខណៈលោកចាត់ទុកការប្រកួតនេះ ដូចជាការប្រកួតលីគកំពូលកម្ពុជាដែរ។
គ្រូបង្វឹកសញ្ជាតិអ៊ុយក្រែនរូបនេះបានបញ្ជាក់ថា វាជារឿងមួយដ៏ល្អដែល CNCC និងក្លិបបានឯកភាពគ្នារៀបចំពានរង្វាន់ League Cup នេះឡើង ដ្បិតការប្រកួតទាំងអស់នឹងជំរុញទឹកចិត្ត និងការប្រមូលអារម្មណ៍ក្នុងការប្រកួត។ លោកបានប្រៀបធៀបកាករប្រកួតនេះ ដូចជាការប្រកួតលីគកំពូលកម្ពុជាដែរ ហើយលោកកំពុងទន្ទឹងរង់ចាំការប្រកួតមកដល់ដូចគ្នា។ អ្វីដែលសំខាន់ លោកក៏នឹងផ្ដល់ឱកាសដល់កីឡាករមួយចំនួន ពិសេសកីឡាករវ័យក្មេងដើម្បីបង្ហាញខ្លួនក្នុងការប្រកួតពានរង្វាន់រយៈពេលខ្លីនេះ ប៉ុន្តែក៏អាស្រ័យលើទម្រង់លេង និងការខិតខំប្រឹងប្រែងហ្វឹកហាត់របស់ពួកគេផងដែរ។ គួរបញ្ជាក់ថា ពានរង្វាន់ League Cup 2021 គ្រោងប្រកួតជិត ១ខែចាប់ពីថ្ងៃទី៥ ដល់ថ្ងៃទី២៧ ខែមិថុនា ដោយមាន ៨ក្លិបចូលរួម និងបែងចែកជា ២ពូល ក្នុងនោះក្លិបភ្នំពេញក្រោនស្ថិតក្នុងពូល A ជាមួយក្លិបបឹងកេត វិសាខា និង ISI ដង្កោសែនជ័យ។ ចំណែកពូល B មាន ៤ក្រុមដូចគ្នា រួមមានក្លិបព្រះខ័នរាជស្វាយរៀង, កងយោធពលខេមរភូមិន្ទ, ខេត្តព្រៃវែង និងយុវជនសាលាបាល់ទាត់ជាតិបាទី។
ការប្រកួតនេះរៀបចំឡើងបន្ទាប់ពីក្រុមជម្រើសជាតិកម្ពុជា ជាប់បេសកកម្មប្រកួតជម្រុះពានរង្វាន់បាល់ទាត់ពិភពលោកឆ្នាំ២០២២ នៅប្រទេសបារ៉ែន ក៏ដូចជាការផ្ដល់ឱកាសឲ្យកីឡាករក្លិបនីមួយៗបានពង្រឹងសមត្ថភាព និងបច្ចេកទេសត្រៀមការប្រកួតលីគត្រឡប់មកវិញ ពិសេសក្លិបបឹងកេត និងវិសាខាដែលត្រូវចូលរួមប្រកួតវគ្គចែកពូល និងវគ្គជម្រុះពានរង្វាន់ AFC Cup 2021 នាចុងខែមិថុនានេះតែម្ដង៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
