កាណាដា ៖ ឯកអគ្គរដ្ឋទូតកាណាដាប្រចាំនៅអង្គការសហប្រជាជាតិ(UN)លោក Bob Rae និយាយថា ប្រទេសរបស់លោក បានប្តេជ្ញាចិត្តថានឹងមើលឃើញយុត្តិធម៌នៅក្នុងការវាយលុករបស់រុស្ស៊ីនៅអ៊ុយក្រែន ស្របពេលដែលលោកថ្លែងសុន្ទរកថាទៅកាន់មហាសន្និបាតអង្គការសហប្រជាជាតិកាលពីថ្ងៃអង្គារ ។ 

 លោកនិយាយថា វាគឺជាសង្រ្គាមមួយដែលមិនស្របច្បាប់ ហើយវាគឺជាសង្រ្គាមមួយដែលអសីលធម៌ និងជាសង្រ្គាមមួយដែលផ្តើមឡើងដោយសារតែរុស្ស៊ី ហើយរុស្ស៊ីអាចបញ្ចប់វាបាន ។ 

 លោកថា រុស្ស៊ីអាចបញ្ចប់វាបានឥឡូវនេះភ្លាម ដោយគ្រាន់តែនិយាយស្រួលៗថា វាកន្លងផុតទៅហើយៗពួកយើងនឹងដកទាហានមកវិញ ។ បញ្ចប់សង្រ្គាម និងគ្មានការវាយលុករបស់រុស្ស៊ីតទៅទៀតនោះទេ ។ សន្តិភាពនឹងកើតមាន មនុស្សចង់បានសន្តិភាព ពួកគេគឺជាភាគីដែលអាចបង្កើតសន្តិភាពដោយងាយស្រួលបំផុត ។ 

 នាយករដ្ឋមន្រ្តីកាណាដា លោក Justin Trudeau ស្ថិតនៅក្នុងចំណោមក្រុមអ្នកគាំទ្រខ្លាំងបំផុតឲ្យអ៊ុយក្រែនការពារប្រឆាំងនឹងការវាយលុករបស់រុស្ស៊ីកាលពីខែកុម្ភៈ ឆ្នាំ ២០២២កន្លងទៅ ។ 

 ចាប់តាំងពីការចាប់ផ្តើមសង្រ្គាម កាណាដា បានប្តេជ្ញាចិត្តផ្តល់ជំនួយ ៥,៩ពាន់លានដុល្លារដល់អ៊ុយក្រែន ដែលរួមទាំងជំនួយយោធា ១,៣ពាន់លានដុល្លារ ។ 

 លោក Trudeau និយាយថា កាណាដា នឹងផ្តល់ជំនួយយោធា ៤៨១លានដុល្លារបន្ថែមទៀត ក្នុងរយៈពេល ៣ឆ្នាំ ក្រោយ ដើម្បីផ្គត់ផ្គង់រថពាសដែក ៥០គ្រឿងដល់អ៊ុយក្រែន ។ ទីក្រុង Ottawa នឹងបញ្ជូនគ្រូបង្វឹក ទៅជួយបង្វឹកអាកាសយានិកអ៊ុយក្រែន ឲ្យចេះបើកបរយន្តហោះចម្បាំង F-16 ៕