បណ្ដាអ្នកស្រាវជ្រាវនានា បានព្យាករថា ការកកើត «មហាទ្វីប« ថ្មី អាចបំផ្លាញមនុស្ស និងថនិកសត្វដទៃទៀត ដែលនៅមានជីវិត ក្នុងរយៈពេល ២៥០លានឆ្នាំខាងមុខ។

ដោយប្រើប្រាស់គំរូអាកាសធាតុរបស់កុំព្យូទ័រទំនើបបំផុតដំបូងគេមិនធ្លាប់មាន ដើម្បីប្រមើលមើលពីអនាគតដ៏វែងឆ្ងាយនោះ បណ្ដាអ្នកវិទ្យាសាស្ត្រមកពីសាកលវិទ្យាល័យ Bristol (University of Bristol) នៅចក្រភពអង់គ្លេស បានប៉ាន់ស្មានពីរបៀបថា តើអាកាសធាតុ នឹងឡើងក្ដៅកាន់តែខ្លាំងយ៉ាងដូចម្ដេច បន្ទាប់ពីទ្វីបទាំងឡាយរបស់ភពផែនដីរលាយចូលគ្នាបង្កើតបានជាមហាទ្វីបមួយ ឈ្មោះ «Pangea Ultima» ក្នុងរយៈពេលប្រមាណជា ២៥០លានឆ្នាំខាងមុខ។

អ្នកស្រាវជ្រាវ បានរកឃើញថា មហាទ្វីបនោះនឹងមានកម្ដៅក្ដៅខ្លាំងបំផុត ស្ងួតហែង និងស្ទើរតែមិនអាចផ្ដល់ភាពមានជិវិតដល់មនុស្ស និងពពួកថនិកសត្វ ដែលមិនមានការវិវឌ្ឍ ដើម្បីសម្របខ្លួននឹងការត្រូវកម្ដៅក្ដៅខ្លាំងពេករយៈពេលយូរ។ អ្នកស្រាវជ្រាវទាំងនោះ បានយកគំរូតាមនិន្នាការនៃសីតុណ្ហភាព ខ្យល់ ភ្លៀង និងសំណើម សម្រាប់មហាទ្វីប ហើយបានប្រើប្រាស់គំរូនៃការវិវឌ្ឍសំបកផែនដី គីមីវិទ្យា និងជីវវិទ្យាមហាសមុទ្រ ដើម្បីគណនាកម្រិតកាបូនឌីអុកស៊ីត។

ការស្រាវជ្រាវបានរកឃើញថា មិនត្រឹមតែការកកើតមហាទ្វីប Pangea Ultima ដែលនាំឲ្យមានការផ្ទុះភ្នំភ្លើងញឹកញាប់ ការបញ្ចេញកាបូនឌីអុកស៊ីតទៅក្នុងបរិយាកាស និងធ្វើឲ្យភពផែនដីឡើងក្តៅកាន់តែខ្លាំងប៉ុណ្ណោះទេ តែព្រះអាទិត្យក៏នឹងបញ្ចេញពន្លឺកាន់តែភ្លឺជាងមុន ដែលនឹងបញ្ចេញថាមពលកាន់តែច្រើន និងធ្វើឲ្យផែនដីកាន់តែក្ដៅ។ នេះបើតាមការកត់សម្គាល់របស់អ្នកជំនាញ ក្នុងឯកសារ ដែលចុះផ្សាយដោយសារព័ត៌មាន Nature Geoscience។

ដូច្នេះ ជារួម តាមការលើកឡើងរបស់អ្នកវិទ្យាសាស្ត្រនៃការកកើតមហាទ្វីបថ្មីនេះ មានន័យថា ការឡើងកម្ដៅកាន់តែខ្លាំង ដែលមានចន្លោះយ៉ាងហោចណាស់ពី ៤០អង្សាសេ ទៅ៥០អង្សាសេ នឹងបង្កើតបានជាបរិយាកាសមួយ ដែលមិនមានប្រភពផ្ដល់ចំណីអាហារ ឬទឹកដល់មនុស្ស និងពពួកថនិកសត្វនោះឡើយ៕