ភ្នំពេញ៖ ឯកឧត្តម ហូត ហាក់ រដ្ឋមន្ត្រីក្រសួងអធិការកិច្ច បានថ្លែងថា ការអនុវត្តការងាររបស់ក្រសួងអធិការកិច្ច និងអង្គភាពប្រឆាំងអំពើពុករលួយ (ACU) មានលក្ខណៈប្រហាក់ប្រហែលគ្នា ប៉ុន្តែមិនជាន់ការងារគ្នានោះទេ ដោយក្រសួងអនុវត្តការងារបែបត្រជាក់ ហើយ ACU អនុវត្តការងារបែបក្តៅ ។

ក្នុងពេលចូលបំភ្លឺជូនសមាជិកក្រុមប្រឹក្សាធម្មនុញ្ញ ពាក់ព័ន្ធច្បាប់ស្តីពី ការបង្កើតក្រសួងអធិការកិច្ច នៅថ្ងៃទី២៧ ខែកញ្ញា ឆ្នាំ២០២៣ ឯកឧត្តម ហួត ហាក់ មានប្រសាសន៍ ACU ជាអង្គភាពមួយចំណុះរាជរដ្ឋាភិបាល ដូចគ្នាទៅនឹងក្រសួងអធិការកិច្ច មានគោលដៅក៏ដូចគ្នា ហើយ សមត្ថកិច្ចរបស់ក្រសួងអធិការកិច្ច មានដូចជាការរៀបចំផែនការ ត្រួតពិនិត្យ និងអនុវត្តតាមបទបញ្ជារបស់រាជរដ្ឋាភិបាល ចំណែក ACU ខុសគ្នាជាមួយក្រសួងអធិការកិច្ច ត្រង់ចំណុចការអនុវត្ត ការងារមិនមានរៀបចំផែនការទុកមុន ។

ឯកឧត្តមបន្តថា មើលទៅការងារ នៃក្រសួង និងអង្គភាពទាំងពីរនេះ មានភាពស្រដៀងគ្នា ហើយបង្កើតនូវស្ថានភាពសុខដុមរណីយកម្ម មិនជាន់គ្នា មិនទៅដណ្ដើមការងារគ្នា តែមានការលើកឡើងពីស្ថាប័ន អង្គភាព ឬបុគ្គលឯកជន ថាមានស្ថាប័នត្រួតពិនិត្យច្រើន ដែលនេះជាបញ្ហាប្រឈមមួយ ។

រដ្ឋមន្ត្រីក្រសួងអធិការកិច្ច បន្ថែមថា ជាគោលដៅ ដើម្បីមានភាពស្អាតស្អំនៅក្នុងសង្គម លើកកម្ពស់អភិបាលកិច្ចល្អ ប៉ុន្តែមិនចង់ធ្វើឲ្យមានការរំខាន សម្រាប់បុគ្គល ឬស្ថាប័ន ដូចនេះ តាមពីរាជរដ្ឋាភិបាលអាណត្តិមុន បន្តមកអាណត្តិនេះ កំពុងសិក្សារៀបចំផែនការរួម បង្កើតជាប្រតិទិនមួយ អនុវត្តមកាងារមិនមានភាពជាន់គ្នា ។

ឯកឧត្តម ហួត ហាក់ បានបញ្ជាក់ថា ក្រៅពីក្រសួងអធិការកិច្ច និងអង្គភាពប្រឆាំងអំពើពុករលួយ គឺនៅមានស្ថាប័នចំនួន២ទៀត ដែលមានគោលដៅរួម ចង់ឲ្យបុគ្គល ស្ថាប័នពាក់ព័ន្ធនឹងរដ្ឋ ដើរត្រង់ផ្លូវ ស្អាតស្អំ ក្នុងនោះអាជ្ញាធរសវនកម្មជាតិ ដែលមានបេសកកម្មធ្វើការរបាយការណ៍លើបញ្ហាហិរញ្ញវត្ថុ ផ្ញើជូនទៅរដ្ឋសភា។ មួយទៀត គឺអគ្គធិការនៃក្រសួងសេដ្ឋកិច្ចហិរញ្ញវត្ថុ ដែលផ្ដោតលើការត្រួតពិនិត្យការប្រើប្រាស់ថវិការដ្ឋ តាមក្រសួងស្ថាប័ន ប្រើប្រាស់ចំគោលដៅ ឬយ៉ាងណា ៕ អត្ថបទ ៖ បាន សុខរិទ្ធិ