ប្រព័ន្ធផ្សព្វផ្សាយរដ្ឋ KCNA បានរាយការណ៍ នៅថ្ងៃពុធ (ទី២៧ ខែកញ្ញា) នេះ ថា កូរ៉េខាងជើងបានសម្រេចបណ្តេញទាហានអាមេរិកឈ្មោះ Travis King ដោយប្រទេសនេះ បានឲ្យដឹងថា ទាហានរូបនេះបានសារភាពថា ខ្លួនបានឆ្លងចូលប្រទេសដោយខុសច្បាប់។

នាយទាហាន ដែលមានឈ្មោះពេញ Travis T. King បានចូលទឹកដីកូរ៉េជើងទាំងប្រញាប់ប្រញាល់ កាលពីថ្ងៃទី១៨ ខែកក្កដា ខណៈកំពុងធ្វើដំណើរកម្សាន្តឯកជន នៅតំបន់សន្តិសុខរួម (JSA) នៅតាមព្រំដែនដែលមានកំពែងយ៉ាងរឹងមាំ រវាងប្រទេសកូរ៉េទាំងពីរ។ មន្ត្រីសហរដ្ឋអាមេរិកបាននិយាយថា ពួកគេជឿថា លោក King បានឆ្លងព្រំដែនដោយចេតនា។

គួរបញ្ជាក់ដែរថា លោក King បានចូលរួមជាមួយកងទ័ពសហរដ្ឋអាមេរិក ក្នុងខែមករា ឆ្នាំ២០២១ ហើយបានបម្រើការជាទ័ពចារកម្មជំនួយជាមួយកងកម្លាំងឆ្លាស់វេនរបស់កូរ៉េខាងត្បូង ដែលជាផ្នែកមួយនៃការប្តេជ្ញាគាំទ្រផ្នែកសន្តិសុខរបស់សហរដ្ឋអាមេរិក ដែលមានអាយុរាប់ទសវត្សរ៍មកហើយ ចំពោះកូរ៉េខាងត្បូង។ 

យោងតាមឯកសារតុលាការ បានឲ្យដឹងថា រូបគេប្រឈមនឹងការចោទប្រកាន់ពីបទល្មើស ២ករណី នៅកូរ៉េខាងត្បូង ហើយនៅទីបំផុត បានសារភាពពីភាពមានទោសពៃរ៍ ពីបទវាយដំមួយករណី និងបំផ្លាញទ្រព្យសម្បត្តិសាធារណៈ ដោយការធ្វើឱ្យខូចខាតរថយន្តនគរបាល អំឡុងពេលផ្ទុះកំហឹងប្រើសម្ដីមើលងាយមើលថោកដល់ជនជាតិកូរ៉េ។

មន្ត្រីរបស់អាមេរិកបានប្រាប់សារព័ត៌មាន Reuters ថា រហូតមកដល់ពេលនេះ សហរដ្ឋអាមេរិកបានបដិសេធមិនចាត់ថ្នាក់លោក King ជាអ្នកទោសសង្គ្រាមនោះទេ បើទោះបីជារូបេត្រូវបាននាំខ្លួនយកទៅឃុំក្នុងមន្ទីរឃុំឃាំងរបស់កូរ៉េខាងជើងក៏ដោយ៕