កូនឃ្លីលើតុ៖ លោក ស៊ុន សុទ្ធារិទ្ធ អគ្គលេខាធិការសហព័ន្ធកីឡាវាយឃ្លីលើតុកម្ពុជា បានបង្ហាញនូវក្ដីរំពឹងនឹងអាចដណ្ដើមបានលទ្ធផលល្អប្រសើរណាមួយ ក្នុងការប្រកួតកីឡាស៊ីហ្គេម លើកទី៣១ នៅប្រទេសវៀតណាមនាខែវិច្ឆិកាខាងមុខនេះ បន្ទាប់ពីសហព័ន្ធត្រៀមបញ្ជូនកីឡាករ-កីឡាការិនីទៅហ្វឹកហាត់រយៈពេល ៣ខែនៅសាធារណរដ្ឋប្រជាមានិតចិននាពេលខាងមុខ។
អគ្គលេខាធិការសហព័ន្ធដដែលបន្ដថា សហព័ន្ធមិនទាន់ហ៊ានសន្យាថា កីឡាករ-កីឡាការិនីរបស់ខ្លួននឹងឈានដល់មេដាយ ឬយ៉ាងណានោះទេ ប៉ុន្តែផ្អែកតាមផែនការយុទ្ធសាស្ត្ររបស់សហព័ន្ធ ក៏ដូចជាការខិតខំហ្វឹកហាត់ត្រៀមរបស់កីឡាករ-កីឡាការិនីទាំងអស់ លោកជឿជាក់ថា ពួកគេនឹងអាចទទួលបាននូវលទ្ធផលដ៏គាប់ប្រសើរណាមួយ ពីការប្រកួតកីឡាស៊ីហ្គេមចុងឆ្នាំនេះ។ ការបង្ហាញសុទិដ្ឋិនិយមបែបនេះ ស្របពេលសហព័ន្ធកីឡាវាយកូនឃ្លីលើតុកម្ពុជា ត្រៀមបញ្ជូនអត្តពលិករបស់ខ្លួនជាមួយអត្តពលិក ១១ប្រភេទកីឡាផ្សេងទៀតទៅបោះជំរំហ្វឹកហាត់រយៈពេល ៣ខែនៅសាធារណរដ្ឋប្រជាមានិតចិន ដើម្បីបង្កើនសមត្ថភាព និងបច្ចេកទេស មុនការប្រកួតកីឡាស៊ីហ្គេមនៅវៀតណាម ដែលសហព័ន្ធគ្រោងបញ្ជូនកីឡាករ-កីឡាការិនី ៨រូបទៅចូលរួមប្រកួតលើ ៦វិញ្ញាសា។
លោកបន្ថែមថា មានតែការហ្វឹកហាត់នៅចិនទេ ដែលអាចបង្កើននូវសមត្ថភាព និងបច្ចេកទេសល្អប្រសើរ ព្រោះការប្រកួតក្នុងស្រុកក្រុមជម្រើសជាតិ ភាគច្រើនសុទ្ធតែដណ្តើមបានលេខ១ ដែលនេះគឺជាភាពដដែលៗរបស់ពួកគេ។ ដូច្នេះការហ្វឹកហាត់នៅចិនអំឡុងខែសីហាខាងមុខនេះ នឹងជួយក្រុមជម្រើសជាតិកម្ពុជាបង្កើនសមត្ថភាពកាន់តែខ្ពស់ បន្ទាប់ពីជួបជាមួយដៃគូខ្លាំងៗជាក់ជាមិនខាន។ គួរបញ្ជាក់ថា សម្រាប់ការប្រកួតកីឡាស៊ីហ្គេមនៅវៀតណាម ម្ចាស់ផ្ទះបានកំណត់កីឡាចំនួន ៤០ប្រភេទដាក់ឲ្យប្រកួត ក្នុងនោះក៏មានកីឡាវាយកូនឃ្លីលើតុផងដែរ ដោយវៀតណាមបានកំណត់វិញ្ញាសាប្រកួតកីឡានេះចំនួន ៧វិញ្ញាសា ខណៈសហព័ន្ធកីឡាវាយកូនឃ្លីលើតុកម្ពុជាគ្រោងបញ្ជូនអត្តពលិកចំនួន ៨នាក់ចូលរួមប្រកួតលើ ៦វិញ្ញាសា៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
