ស្ថានីទូរទស្សន៍ដែលគ្រប់គ្រងដោយក្រសួងការពារជាតិរុស្ស៊ី បានបង្ហាញវីដេអូសម្ភាសមួយជាមួយ 

មេបញ្ជាការកងទ័ពជើងងទឹកប្រចាំសមុទ្រខ្មៅ លោកវីកទ័រ សូកូឡូវ នៅថ្ងៃពុធនេះ ប៉ុន្មានថ្ងៃបន្ទាប់ពីអ៊ុយក្រែន បានអះអាងថា លោកត្រូវបានសម្លាប់នៅក្នុងការវាយប្រហារដោយមីស៊ីលទៅលើទីបញ្ជាការកងទ័ពជើងទឹករុស្ស៊ីនៅក្នុងទ្វីបគ្រីម៉េ។

នៅក្នុងវីដេអូនេះ លោកសូកូឡូវ បាននិយាយថា កងនាវាសមុទ្រខ្មៅ កំពុងធ្វើសកម្មភាពទទួលបានជោគជ័យ។

គេនៅមិនទាន់ច្បាស់នៅឡើយពីការធ្វើអត្ថាធិប្បាយរបស់លោកថាតើវីដេអូគ្លីបនេះ ត្រូវបានថតទុកឬយ៉ាងណា បន្ទាប់ពីការវាយប្រហាដោយមីស៊ីលរបស់អ៊ុយក្រែន កាលពីថ្ងៃទី២២កញ្ញាមក។

យោងតាមក្រសួងការពារជាតិ បានឲ្យដឹងថា វីដេអូនេះ បានផ្សព្វផ្សាយនៅថ្ងៃទី២៧កញ្ញា បង្ហាញលោកសូកូឡូវ នៅឯព្រឹត្ដិការណ៍ផ្ដល់រង្វាន់ ដើម្បីជាការអបអរសាទរសមាជិកក្រុមបាល់ទាត់សមុទ្រខ្មៅសម្រាប់ការប្រកួតរបស់ពួកគេនៅក្នុងការប្រកួតបាល់ទាត់ធួណាមិន (Tournament) សម្រាប់ក្រុមមកពីកងទ័ពរុស្ស៊ី ដែលត្រូវបានបញ្ចប់ កាលពីថ្ងៃទី១៨កញ្ញាកន្លងទៅនេះ។

អ្នករាយការទូរទស្សន៍ម្នាក់ បានចង្អុលទៅលោកសូកូឡូវថា ព្រឹត្ដិការណ៍ផ្ដល់ពានរង្វាន់នៅកំពង់ផែ សេវ៉ាស្ដូប៉ូល ត្រូវបានពន្យារពេលពីព្រោះព្រឹត្ដិការណ៍ដែលគេបានដឹងនោះ ក្នុងក្រុងកំពង់ផែ អាចដោយសារមានការវាយប្រហារដោយមីស៊ីលរបស់អ៊ុយក្រែន។

លោកសូកូឡូវ បានឆ្លើយតបដោយនិយាយថា ពិធីប្រគល់រង្វាន់ ត្រូវបានពន្យារពេលព្រោះតែហេតុផលផ្សេង ពោលគឺយើងរវល់ ហើយត្រូវតែពន្យារពេលពីរបីថ្ងៃ។