កីឡាករវាយកូនបាល់លេខ ១ ពិភពលោក Novak Djokovic ដែលជាជើងឯកកម្មវិធី Rome Masters​ ៦ លើកនោះ បានទំលាក់រ៉ាកែតវាយកូនបាល់របស់ខ្លួនមួយឡែក ស្រវា​មក​ចាប់​ដង​វាយ​កូន​​គោល បង្ហាញនៅក្នុងព្រឹត្តិការណ៍វាយកូនគោល Ryder Cup លើកទី ៤៤ តែ​ជា​ការ​បង្ហាញ​ដោយ​តារា​ចម្រុះ។

កីឡាករស៊ែបរូបនេះទើបឈ្នះជើងឯក Grand Slam លើកទី ២៤ ក្នុង​អាជីព​ស្មើ​នឹង​កំណត់​ត្រា​របស់​អតីត​កីឡាការិនី Margaret Court ក្រោយឈ្នះពាន US Open កាលពីដើមខែ។

Djokovic បានចូលរួមលេងកូនគោលជាមួយកីឡាករលេខ ១ ពិភពលោកផ្នែកពិការ Kipp Popert នៃក្រុម Ryder Cup អឺរ៉ុបដឹកនាំដោយ Colin Montgomerie រួមជាមួយនឹងវត្តមាន Gareth Bale ផងដែរ។

Djokovic បានចាប់ដៃគូជាមួយ Kipp Popert ប្រកួតជាមួយកីឡាករ F1 អេស្ប៉ាញ Carlos Sainz ដែលទើបឈ្នះការប្រកួតនៅសិង្ហបុរី រួមជាមួយនឹងកីឡាករវាយកូនគោលអ៊ីតាលី Tommaso Perrino ដោយជ័យជំនះបានទៅក្រុម Djokovic ៣-១។

ព្រឹត្តិការណ៍វាយកូនគោល Ryder Cup នឹងចាប់ផ្តើមនៅថ្ងៃសុក្រស្អែកនេះដែលជាព្រឹត្តិការណ៍ទី ៤៤ រវាងក្រុមអាមេរិក និងអឺរ៉ុប នៅលើទឹកដីទីក្រុងរ៉ូមប្រទេសអ៊ីតាលី៕ អត្ថបទ៖នាង សុភាវុធ