សារព័ត៌មាន Financial Times (FT) បានរាយការណ៍កាលពីថ្ងៃអង្គារ (២៦ កញ្ញា) ដោយដកស្រង់ប្រភពជាច្រើនដែលមិនបញ្ចេញឈ្មោះថា អតីតរដ្ឋមន្ត្រីការបរទេសចិន ដែលត្រូវបានបណ្តេញចេញពីតំណែង លោក ឈីន កាង (Qin Gang) មានទំនាក់ទំនងស្នេហាជាមួយពិធីការិនីទូរទស្សន៍ចិនល្បីឈ្មោះម្នាក់ ដែលមានកូនតាមរយៈការពពោះជំនួសនៅសហរដ្ឋអាមេរិក ខណៈបានបង្កើនការចាប់អារម្មណ៍យ៉ាងខ្លាំងជុំវិញការបាត់ខ្លួនដែលមិនអាចពន្យល់បាន និងការដកតំណែងរបស់អ្នកការទូតជាន់ខ្ពស់រូបនេះ។

អ្នកស្រី ហ្វ៊ូ សាវធាន (Fu Xiaotian) វ័យ៤០ ឆ្នាំ ដែលជាអតីតពិធីការិនីនៃកម្មវិធីជជែកដ៏ល្បីឈ្មោះមួយរូប នៅលើទូរទស្សន៍ Phoenix TV ដែលមានមូលដ្ឋាននៅទីក្រុងហុងកុង មានទំនាក់ទំនងស្នេហាជាមួយលោក ឈីន វ័យ៥៧ ឆ្នាំ ដោយសំអាងដល់មនុស្ស៦នាក់ ដែលជិតស្និទ្ធនឹងអ្នកស្រី ហ្វ៊ូ និងទីភ្នាក់ងារបង្កើតគោលនយោបាយការបរទេសរបស់ចិន ដែលដឹងពីបញ្ហានេះ។

អ្នកស្រី ហ្វ៊ូ មានកូនម្នាក់កាលពីឆ្នាំមុន ដោយមានជំនួយពីម្តាយពពោះជំនួសនៅសហរដ្ឋអាមេរិក នេះបើយោងតាមប្រភពមិនបញ្ចេញឈ្មោះមួយ ដែលបានដកស្រង់នៅក្នុងរបាយការណ៍របស់សារព័ត៌មាន FT ដោយមិនបង្ហាញពីអត្តសញ្ញាណរបស់ឪពុករបស់ក្មេងម្នាក់នោះទេ។

របាយការណ៍របស់សារព័ត៌មាន FT មួយនេះ គឺជាការជីកកកាយចុងក្រោយបង្អស់នៅក្នុងអាថ៌កំបាំងជុំវិញលោក ឈីន ដែលជាជំនួយការដ៏គួរឱ្យទុកចិត្តរបស់មេដឹកនាំចិន លោក ស៊ី ជីនពីង និងដែលត្រូវបានដកចេញពីតំណែងជារដ្ឋមន្ត្រីការបរទេសភ្លាមៗនៅក្នុងខែកក្កដា បន្ទាប់ពីបាត់ខ្លួនពីទិដ្ឋភាពសាធារណៈអស់រយៈពេលមួយខែ។

ទីក្រុងប៉េកាំងមិនបានផ្តល់ការពន្យល់សម្រាប់ការបណ្តេញលោក ឈីន ចេញពីតំណែងនេះទេ ហើយបានបដិសេធសំណួរម្តងហើយម្តងទៀតអំពីជោគវាសនារបស់លោក ឈីន ពីក្រុមអ្នកសារព័ត៌មានបរទេសនៅក្នុងសន្និសីទសារព័ត៌មានផងដែរ៕