ម៉ាស់បានវិលត្រឡប់មកវិញហើយកាលពីថ្ងៃពុធនៅតាមដងផ្លូវក្នុងទីក្រុង La Paz ស្របពេលដែលសំណុំផ្សែងគ្របដណ្តប់លើផ្ទៃមេឃ ធ្វើឲ្យកម្រិតគុណភាពខ្យល់អាក្រក់កើនឡើងទ្វេដងនៅរដ្ឋធានីរបស់ប្រទេសបូលីវីមួយនេះ ។

 រដ្ឋាភិបាលក្នុងស្រុកបានជូនដំណឹងនៅក្នុងសេចក្តីថ្លែងការណ៍ថា សំណុំផ្សែងដ៏ក្រាស់ឃ្មឹក បានបណ្តាលមកពីការដុតព្រៃឈើធ្វើកសិកម្មនៅតំបន់ Yungas ស្ថិតនៅតំបន់ភាគឦសានទីក្រុង La Paz ដើម្បីរៀបចំដីដាំដំណាំកូកា និងរុករករ៉ែ ។

 យោងតាមការអះអាងរបស់លោក Jose Eduardo Galindo គឺជារដ្ឋមន្រ្តីគ្រប់គ្រងបរិស្ថាន និងថាមពលបង្កើតថ្មីក្រុង La Paz បានឲ្យដឹងថា សន្ទស្សន៍គុណភាពខ្យល់អាក្រក់ បានកើនឡើងពី ១០៥ រហូតដល់ ២០៨ ធ្វើឲ្យវាប៉ះពាល់យ៉ាងខ្លាំងដល់សុខភាពរបស់មនុស្សទាំងអស់ ។

 រដ្ឋាភិបាលក្នុងស្រុកនិយាយនៅក្នុងសេចក្តីថ្លែងការណ៍ថា ហានិភ័យសម្រាប់សុខភាពមនុស្ស អាចអាក្រក់បំផុតដោយសារតែសីតុណ្ហភាពខ្ពស់ ដោយពួកគេណែនាំឲ្យប្រជាពលរដ្ឋពាក់ម៉ាស់ ជៀសវាងសម្មភាពរាងកាយខាងក្រៅ ហើយនិងលាងចំណីអាហារ មុនពេលទទួលទាន ។

 លោក Lourdes Pasគឺជាពលរដ្ឋក្នុងស្រុកមួយរូប និយាយថា គុណភាពខ្យល់ បានធ្លាក់ចុះ ។ វាមើលទៅដូចជាមេឃមានពពកច្រើនអញ្ចឹង ប៉ុន្តែពួកយើងដឹងច្បាស់ថា វាគឺជាផ្សែងមកពីការដុតព្រៃឈើធ្វើកសិកម្ម ហើយវាធ្វើឲ្យប៉ះពាល់យ៉ាងខ្លាំងដល់សុខភាពរបស់ពួកយើង ។ 

 លោកបន្តថា មាននូវសេចក្តីថ្លែងការណ៍ពីរដ្ឋាភិបាលក្នុងស្រុក ហើយលោកគិតថា វាគឺជារឿងត្រឹមត្រូវកាលដែលពួកគេជូនដំណឹងដល់ពួកយើងឲ្យពាក់ម៉ាស់ ដោយសារតែវានឹងការពារសុខភាពរបស់ពួកយើង ។ បំពង់ក.របស់លោក បានឈឺ ហើយបំពង់ក.កូនស្រីរបស់លោក ឈឺដូចគ្នា ។ កូនស្រីរបស់លោកអត់ឈឺទេ ប៉ុន្តែវាធ្វើឲ្យប៉ះពាល់ដល់ប្រព័ន្ធផ្លូវដង្ហើមរបស់នាង ៕