ភ្នំពេញ ៖មន្ត្រីជាន់ខ្ពស់ក្រសួងសង្គមកិច្ច អតីតយុទ្ធជន និងយុវនីតិសម្បទា បានលើកទឹកចិត្តដល់អង្គការមូលនិធិជនពិការ និងអង្គការតំណក់ទឹក បន្តដំណើរការជួយដល់ កុមារ ឬយុវវ័យជនមានពិការភាពនៅកម្ពុជាពិសេសចំពោះគម្រោងស្នើសុំថវិកាជាមុន ខណៈគម្រោងថ្មីនៃកម្មវិធី ACCESS នឹងចាប់ផ្តើមប្រកាសដាក់ឱ្យស្នើសុំថវិកានាពេលឆាប់ៗខាងមុខនេះ។

​ឯកឧត្តម ឯម ច័ន្ទមករា រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា និងជាអគ្គលេ ខាធិការក្រុមប្រឹក្សាសកម្មភាពជនពិការ បានប្រកាសគាំទ្របែបនេះក្នុងឱកាសទទួលជួបពិភាក្សាការងារជាមួយស្ថាបនិកអង្គការមូលនិធិកុមារពិការ និងប្រធានកម្មវិធីនៃអង្គការដំណក់ទឹកនៅទីស្តីការក្រសួងនាថ្ងៃ២៧កញ្ញា ២០២៣។

ក្នុងឱកាសនេះឯកឧត្តមឯម ច័ន្ទមករា បានលើកឡើងអំពីភាពជោគជ័យនៃការអនុវត្តច្បាប់ស្តីពីកិច្ចការពារ និងការលើកកម្ពស់សិទ្ធិជនមានពិការ, អនុសញ្ញាស្តីពីសិទ្ធិជនមានពិការភាព និងលិខិតបទដ្ឋានគតិយុត្តិផ្សេងៗដោយឯកឧត្តមបានសង្កត់ធ្ងន់ថា លទ្ធផលទាំងនោះបានមកដោយមិនមែនជាការចៃដន្យនោះទេ គឺបានមកពីការចូលរួមកិច្ចសហប្រតិបត្តិការណ៍ពីគ្រប់ភាគី។

លោកបណ្ឌិត គង់ វិចិត្រា ស្ថាបនិកអង្គការមូលនិធិកុមារពិការបានបញ្ជាក់ថា អង្គការមូលនិធិកុមារពិការបានរួមសហការជាមួយអង្គការតំណក់ទឹក ដើម្បីលើកកម្ពស់និងជួយអភិវឌ្ឍសិទ្ធិជនមានពិការភាពជាពិសេសជនមានពិការខ្សោយសតិបញ្ញា។

លោកបន្តថា អង្គការមូលនិធិកុមារពិការទោះបីជួបការលំបាកច្រើនក្នុងកំឡុងពេលនៃវិបត្តិកូវីដ-១៩ និងសេដ្ឋកិច្ច ប៉ុន្តែអង្គការបានរៃអង្គាសន៍ថវិកាពីបណ្តាក្រុមហ៊ុនឯកជនជួយដល់កុមារពិការខ្សោយសតិបញ្ញានិងមានឆន្ទៈជួយដល់ជនពិការខ្សោយសតិបញ្ញា។

ជាការឆ្លើយតប ឯកឧត្តម ឯម ច័ន្ទមករា បានកោតសរសើរពីកិច្ចខិតខំប្រឹងប្រែងធ្វើសកម្មភាពជាច្រើនរបស់អង្គការមូលនិធិជនពិការ និងអង្គការដំណក់ទឹក ដែលបានជួយដល់រាជរដ្ឋាភិបាល ក៏ដូចជាក្រសួងសង្គមកិច្ច ពិសេសជួយដល់ការអនុវត្តផែនការយុទ្ធសាស្ត្រជាតិស្តីពីពិការភាព៕ អត្ថបទ៖ភារម្យ