ក្រោយដើរកាត់ក្រុមអ្នកសារព័ត៌មានកាលពីថ្ងៃពុធ សមាជិកព្រឹទ្ធសភាសហរដ្ឋអាមេរិកលោក Bob Menendez និងភរិយា Nadine បានផ្តល់ចម្លើយគ្មានទោសនៅតុលាការសហព័ន្ធក្រុង Manhattan ចំពោះការចោទប្រកាន់លើបទទទួលសំណូកពីក្រុមធុរកិច្ចរដ្ឋ New Jersey ចំនួន ៣រូប ។

 កាលពីសប្តាហ៍មុន ក្រុមរដ្ឋអាជ្ញា បានចោទប្រកាន់លោក Menendez និងភរិយារបស់លោកថាបានទទួលយកដុំមាស និងប្រាក់រាប់ម៉ឺនដុល្លារ ជាការដោះដូរឲ្យសមាជិកព្រឹទ្ធសភារូបនេះ ប្រើប្រាស់ឥទ្ធិពលរបស់លោកលើការផ្តល់ជំនួយដល់រដ្ឋាភិបាលអេហ្ស៊ីប ។

 លោករងការចោទប្រកាន់ផងដែរថាបានជ្រៀតជ្រែកចូលទៅក្នុងការស៊ើបអង្កេតការពង្រឹងច្បាប់លើក្រុមធុរកិច្ច គឺជាករណីចោទប្រកាន់មួយដែលលោកបានផ្តល់ចម្លើយគ្មានទោសដូចគ្នា ។

 ក្រុមរដ្ឋអាជ្ញា និយាយថា អ្នកជំនួញ Wael Hana បានរៀបចំឲ្យមានជំនួបរវាងសមាជិកព្រឹទ្ធសភារូបនេះ និងក្រុមមន្រ្តីអេហ្ស៊ីប ដែលបានជំរុញរូបលោកឲ្យយល់ព្រមលើជំនួយយោធា ជាការដោះដូរឲ្យភរិយាយរបស់លោកជួលបុគ្គលិកក្រុមហ៊ុនដែលលោក Hana គ្រប់គ្រង ។

 កាលពីថ្ងៃអង្គារកន្លងទៅ លោក Hana ត្រូវបានតុលាការដោះលែងឲ្យមានសេរីភាពជាមួយនឹងការដាក់ប្រាក់តម្កល់ ៥លានដុល្លារ ។

 ចាប់តាំងពីការចោទប្រកាន់កាលពីថ្ងៃសុក្រសប្តាហ៍មុន ជាងពាក់កណ្តាលនៃសមាជិកព្រឹទ្ធសភាមកពីគណបក្សប្រជាធិបតេយ្យ បានអំពាវនាវឲ្យលោក Menendez លាលែងពីតំណែង ។

 លោកពិតជាបានលាលែងពីតំណែងជាប្រធានគណៈកម្មាធិការទំនាក់ទំនងបរទេសព្រឹទ្ធសភាសហរដ្ឋអាមេរិក ដោយសារជាតម្រូវការក្រោមការគ្រប់គ្រងគណបក្សរបស់លោក ប៉ុន្តែកាលពីថ្ងៃចន្ទ លោកនិយាយថា លោកនឹងមិនលាលែងពីតំណែងសមាជិកព្រឹទ្ធសភាជាដាច់ខាត ។

 លោក Menendez និយាយថា អ្វីទាំងអស់ដែលខ្ញុំសុំនៅពេលនេះពីសហការីនៅក្នុងសភា ក្រុមមេដឹកនាំឈ្នះឆ្នោត និងក្រុមអ្នកគាំទ្ររដ្ឋ New Jersey ដែលខ្ញុំធ្វើការជាមួយអស់រយៈពេលជាច្រើនឆ្នាំមកហើយនោះ ក៏ដូចជាអ្នករាល់គ្នាដែលចាត់ទុករដ្ឋ New Jersey ថាជាផ្ទះរបស់ខ្លួន គឺផ្អាក និងអនុញ្ញាតឲ្យបង្ហាញការពិតចេញទាំងអស់សិន ។

 គួរឲ្យដឹងថា ការស៊ើបអង្កេតចុងក្រោយនេះ គឺជាលើកទី ៣ហើយដែលលោក Menendez ស្ថិតក្រោមការស៊ើបអង្កេតដោយក្រុមរដ្ឋអាជ្ញាសហព័ន្ធ បើទោះបីជារូបលោក ពុំធ្លាប់ត្រូវបានកាត់ទោសក៏ដោយ ៕