ឯកអគ្គរដ្ឋទូតបារាំងប្រចាំប្រទេសនីហ្សេ បានចាកចេញពីប្រទេសនេះហើយ កាលពីព្រឹកថ្ងៃពុធ (ទី២៧ ខែកញ្ញា) ពោលគឺប្រហែលមួយខែ បន្ទាប់ពីរដ្ឋាភិបាលយោធាបានបញ្ជាឲ្យលោកអគ្គរដ្ឋទូតចាកចេញ និងប៉ុន្មានថ្ងៃបន្ទាប់ពីប្រធានាធិបតីបារាំង លោក Emmanuel Macron បាននិយាយថា អ្នកការទូតនឹងត្រូវចាកចេញ ហើយកងទ័ពរបស់បារាំង ក៏ត្រូវដកចេញដែរ។

ទំនាក់ទំនង រវាងនីហ្សេ និងប្រទេសអតីតធ្វើអាណានិគមលើខ្លួន គឺបារាំង ដែលបន្តរក្សាវត្តមានយោធា ក្នុងប្រទេសនេះ ដើម្បីជួយប្រយុទ្ធប្រឆាំងនឹងពួកបះបោរអ៊ីស្លាមនោះ បានចាប់ផ្ដើមបែកបាក់ តាំងពីមន្រ្តីកងទ័ព បានដណ្តើមអំណាចនៅទីក្រុងនីញ៉ាមេ ក្នុងខែកក្កដា។

របបយោធាបានបញ្ជាឲ្យឯកអគ្គរដ្ឋទូតបារាំងលោក Sylvain Itte ចាកចេញពីប្រទេស ក្នុងរយៈពេល ៤៨ ម៉ោងនៅចុងខែសីហា ដើម្បីឆ្លើយតបទៅនឹងអ្វី ដែលពួកគេបានពិពណ៌នាថា ប្រទេសបារាំង មានសកម្មភាព «ផ្ទុយនឹងផលប្រយោជន៍របស់នីហ្សេ»។

ដំបូងឡើយ បារាំងមិនអើពើនឹងបទបញ្ជានេះទេ ព្រោះខ្លួនចាត់ទុកថា រដ្ឋាភិបាលយោធា គឺមិនស្របច្បាប់ ហើយបានអំពាវនាវឲ្យមានការប្រគល់អំណាចដល់ប្រធានាធិបតីជាប់ឆ្នោត លោក Mohamed Bazoum វិញ។ ប៉ុន្តែកាលពីថ្ងៃអាទិត្យ (ថ្ងៃទី ២៤ ខែកញ្ញា) លោក Macron បានប្រកាសថា ឯកអគ្គរដ្ឋទូតនឹងត្រឡប់ទៅទីកាន់ក្រុងប៉ារីសវិញ ហើយកងទ័ពបារាំងក៏នឹងចាកចេញដែរ។

ក្រោយមានការប្រកាសដកឯកអគ្គរដ្ឋទូតនិងកងទ័ពរបស់បារាំងនេះ អ្នកស្រុកទីក្រុងនីញ៉ាមេ បាននិយាយថា វាជាថ្ងៃដ៏គួរឲ្យមានមោទនភាព ហើយក៏កំពុងទន្ទឹងរង់ចាំនូវការដកកងទ័ពបារាំងចេញពីប្រទេសនេះផងដែរ៕