តុលាការវៀតណាមបានកាត់ទោសសកម្មជនបរិស្ថានម្នាក់ឲ្យជាប់ពន្ធនាគាររយៈពេល ៣ឆ្នាំ ក្រោមការចោទប្រកាន់ពីបទក្លែងបន្លំពន្ធ ដែលការសម្រេចក្ដីនេះ កើតមានឡើងត្រឹមតែប៉ុន្មានថ្ងៃប៉ុណ្ណោះបន្ទាប់ពីរដ្ឋាភិបាលបានពិភាក្សាអំពីការការពារសិទ្ធិមនុស្សជាមួយប្រធានាធិបតីសហរដ្ឋអាមេរិក លោក Joe Biden ក្នុងដំណើរទស្សនកិច្ចផ្លូវរដ្ឋកន្លងទៅថ្មីៗនេះ។

លោកស្រី Hoang Thi Minh Hong ប្រធានក្រុមអ្នកតស៊ូមតិបរិស្ថាន ដែលលោកស្រីបានចាប់ផ្តើមបង្កើតឡើងក្នុងឆ្នាំ២០១៣ និងដែលដំណើរការរហូតដល់ឆ្នាំ២០២២ ត្រូវបានផ្ដន្ទាទោសពីបទគេចពន្ធ បន្ទាប់ពីមានការកាត់ក្តី នៅទីក្រុងហូជីមិញ នាថ្ងៃព្រហស្បតិ៍ (ទី២៨ ខែកញ្ញា) នេះ ដែលដំណើរការនៃសវនការ មានរយៈពេលកន្លះថ្ងៃ។ នេះបើយោងតាមមេធាវីរបស់អ្នកជាប់ទោស លោក Nguyen Van Tu។

លោក Tu បានប្រាប់សារព័ត៌មាន Reuters តាមទូរស័ព្ទថា៖ «លោកស្រី Hong បានសារភាពពីភាពមានទោសពៃរ៍ ដូច្នេះហើយ កិច្ចជំនុំជម្រះក្ដី បានបញ្ចប់យ៉ាងឆាប់រហ័ស»។

សារព័ត៌មាន Thanh Nien បានរាយការណ៍ ដោយដកស្រង់ខ្លឹមសារនៃការចោទប្រកាន់នេះថា លោកស្រី Hong ត្រូវបានចោទប្រកាន់ពីបទគេចមិនបង់ពន្ធ ដែលមានចំនួនទឹកប្រាក់ ៦,៧ពាន់លានដុង (២៧៤.៤៨៨ដុល្លារអាមេរិក) ក្នុងចន្លោះឆ្នាំ២០១២ ដល់ឆ្នាំ២០២២។

មេធាវីរបស់លោកស្រីបានប្រាប់ទៀតថា លោកស្រីក៏ត្រូវបានតម្រូវឲ្យបង់ប្រាក់ពិន័យជាសាច់ប្រាក់ចំនួន ១០០លានដុង (៤.០៩៨,៣៦ដុល្លារអាមេរិក) ផងដែរ ដោយលោកបន្ថែមថា កូនក្ដីរបស់ខ្លួន មានពេល ១៥ថ្ងៃ ដើម្បីធ្វើការសម្រេចចិត្តប្តឹងឧទ្ធរណ៍ ចំពោះសាលក្រមនេះ៕