នគរបាលថៃបានរឹបអូសថ្នាំញៀនមេតំហ្វេតាមីនជាង ១៥លានគ្រាប់ និងសារធាតុខុសច្បាប់ជាច្រើនផ្សេងទៀត ដែលមានតម្លៃ ៣០០លានបាត (៨,១៥លានដុល្លារ) ដែលប្រតិបត្តិការនេះ ត្រូវបានអាជ្ញាធរនិយាយ នៅថ្ងៃព្រហស្បតិ៍ (ទី២៨ ខែកញ្ញា) នេះ ថា ជាការរឹបអូសបានគ្រឿងញៀនដ៏ធំបំផុតមួយ ក្នុងចំណោមការចាប់បានធំបំផុតជាច្រើន រហូតមកដល់ពេលនេះ នាឆ្នាំនេះ។

ជាមួយគ្នានេះ មនុស្ស ៤នាក់ត្រូវបានចាប់ខ្លួន ពាក់ព័ន្ធនឹងការបង្រ្កាបនេះ ដែលរួមមានថ្នាំញៀនប្រភេទមេតំហ្វេតាមីនគ្រីស្តាល់ ៤២០គីឡូក្រាម ព្រមទាំងម្សៅហេរ៉ូអ៊ីន ក្នុងផ្ទះមួយ នៅខេត្តណាខនប៉ាថុំ (Nakhon Pathom) ភាគខាងជើងនៃរដ្ឋធានីបាងកក។

រដ្ឋមន្ត្រីក្រសួងយុត្តិធម៌ លោក Tawee Sodsong បានប្រាប់អ្នកសារព័ត៌មានថា៖ «នេះគឺជាទីកន្លែងផ្ទុកគ្រឿងញៀនដ៏ធំបំផុតមួយ នៅចំកណ្តាលប្រទេសថៃ ក្នុងតំបន់សហគមន៍»៕