អ៊ីរ៉ង់៖ របាយការណ៍ចេញដោយភ្នាក់ងារឃ្លាំមើលថាមពលនុយក្លេអ៊ែរ របស់អង្គការសហប្រជាជាតិបានបង្ហាញកាលពីថ្ងៃចន្ទថា ប្រទេសអ៊ីរ៉ង់ខកខានក្នុងការបកស្រាយពីការតាមដានសកម្មភាពចម្រាញ់អ៊ុយរ៉ានីញ៉ូម ដែលបានរកឃើញនៅទីតាំងមិនបានប្រកាសមួយចំនួន ដែលអាចបញ្ឆេះឲ្យមានការប៉ះទង្គិចផ្នែកការទូតថ្មី រវាងទីក្រុងតេអេរ៉ង់ និងប្រទេសលោកខាងលិច ដែលអាចធ្វើឲ្យបញ្ហាកាន់តែរីកធំ ប៉ះពាល់ដល់ដំណើរការចរចានុយក្លេអ៊ែរ។
កាលពី ៣ខែកន្លងទៅ ចក្រភពអង់គ្លេស បារាំង និងអាល្លឺម៉ង់បានខ្វែងគំនិតគ្នាជុំវិញផែនការគាំទ្រដោយសហរដ្ឋអាមេរិក សម្រាប់ក្រុមប្រឹក្សាភិបាលមានសមាជិក ២៥ប្រទេសរបស់ទីភ្នាក់ងារថាមពលអាតូមិកអន្តរជាតិ ដើម្បីរិះគន់អ៊ីរ៉ង់ចំពោះការខកខានពន្យល់ពីប្រភពដើម នៃវត្ថុធាតុដើមទាំងនោះ ដែលការខ្វែងគំនិតគ្នារបស់ប្រទេសទាំង៣ មានឡើង ខណៈប្រធានទីភ្នាក់ងារនេះលោក Rafael Grossi បានប្រកាសការពិភាក្សាថ្មីជាមួយអ៊ីរ៉ង់។ របាយការណ៍មួយចេញដោយលោក Grossi ផ្ញើជូនរដ្ឋជាសមាជិកទទួលបានដោយសារព័ត៌មាន Reuters បាននិយាយថា បន្ទាប់ពីរយៈពេលជាច្រើនខែមកនេះ ប្រទេសអ៊ីរ៉ង់ពុំបានផ្ដល់ការពន្យល់ចាំបាច់ ស្ដីពីវត្តមានវត្ថុធាតុដើមផលិតនុយក្លេអ៊ែរសសម្រាប់ទីតាំងទាំង ៣ ទេ ជាទីដែលទីភ្នាក់ងារនេះបានវាយតម្លៃបន្ថែម។
ឥលូវនេះវាអាស្រ័យលើមហាអំណាចអឺរ៉ុបទាំង ៣ ក្នុងការសម្រេចថា តើត្រូវជំរុញឲ្យមានសេចក្ដីសម្រេចមួយរិះគន់អ៊ីរ៉ង់ ដែលអាចធ្វើឱ្យអន្តរាយដល់ការចរចា ដើម្បីស្រោចស្រង់កិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ២០១៥ ដែលកំពុងដំណើរការពិភាក្សានៅទីក្រុងវីយែន។ លោកGrossi សង្ឃឹមថា នឹងរាយការណ៍អំពីភាពរីកចម្រើន មុនពេលក្រុមប្រឹក្សាភិបាលជួបគ្នាម្តងទៀតនៅសប្ដាហ៍ក្រោយ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
