ជប៉ុន ៖ ប្រតិបត្តិករនៃក្រុមហ៊ុន TEPCO បាននិយាយកាលពីថ្ងៃព្រហស្បតិ៍ (២៨ កញ្ញា) ថា ការបញ្ចេញទីពីរ នៃទឹកវិទ្យុសកម្មដែលបានធ្វើប្រព្រឹត្តិកម្មរួចពីរោងចក្រថាមពលនុយក្លេអ៊ែរ ហ្វ៊ូគូស៊ីម៉ា ដៃអ៊ីឈី ដែលបានបំផ្លាញ ចូលទៅក្នុងមហាសមុទ្រ នឹងចាប់ផ្តើមនៅថ្ងៃទី៥ ខែតុលា ខាងមុខនេះ ដោយជាវិធានការណ៍មួយដែលទំនងជាទាក់ទាញការខឹងសម្បារបន្ថែមទៀតពីប្រទេសចិន។

ក្រុមហ៊ុនថាមពលអគ្គិសនី TEPCO គ្រោងនឹងបញ្ចេញទឹកវិទ្យុសកម្មប្រមាណ៧.៨០០តោន ដែលជាបរិមាណដូចគ្នានឹងការបង្ហូរចេញលើកដំបូងទៅក្នុងសមុទ្រ ក្នុងរយៈពេលប្រហែល១៧ថ្ងៃ។ ការត្រៀមរៀបចំ នឹងចាប់ផ្តើមនៅថ្ងៃអង្គារសប្តាហ៍ក្រោយ ដើម្បីពិនិត្យមើលកម្រិតសារធាតុទ្រីទីចូម នៅពេលទឹកដែលបានធ្វើប្រព្រឹត្តិកម្មរួច ត្រូវបានសម្លាប់មេរោគជាមួយនឹងទឹកសមុទ្រមុនពេលបញ្ចេញ។

ការបញ្ចេញទឹកដែលបានធ្វើប្រព្រឹត្តិកម្មរួចលើកដំបូង បានចាប់ផ្តើមកាលពីថ្ងៃទី២៤ ខែសីហា ស្របពេលមានការព្រួយបារម្ភក្នុងចំណោមក្រុមអ្នកនេសាទក្នុងស្រុក និងការប្រឆាំងយ៉ាងខ្លាំងក្លាពីប្រទេសចិន ប៉ុន្តែត្រូវបានបញ្ចប់នៅថ្ងៃទី១១ ខែកញ្ញា។ 

ប្រតិបត្តិករ TEPCO និងរដ្ឋាភិបាលជប៉ុនអះអាងថា ការបង្ហូរចោលទឹកដែលបានធ្វើប្រព្រឹត្តិកម្មរួច គឺជាជំហានដ៏សំខាន់មួយឆ្ពោះទៅរកការកាត់ផ្តាច់ទឹកចេញពីរោងចក្រនុយក្លេអ៊ែរ ដែលត្រូវបានខូចខាតយ៉ាងធ្ងន់ធ្ងរ បន្ទាប់ពីគ្រោះមហន្តរាយរញ្ជួយដី និងរលកយក្សស៊ូណាមិ កាលពីឆ្នាំ២០១១ កន្លងមកនេះ៕