ស៊ូដង់ ៖ ការប្រយុទ្ធគ្នាយ៉ាងខ្លាំងក្លា បានបន្តកើតមាន កាលពីថ្ងៃព្រហស្បតិ៍ (ទី២៨ ខែកញ្ញា) រវាងកងកម្លាំងប្រដាប់អាវុធស៊ូដង់ (SAF) និងកងកម្លាំងគាំទ្ររហ័សប៉ារ៉ាយោធា (RSF) នៅទីក្រុងខាទូម (Khartoum) ដោយបានផ្ដាច់ជីវិតជនស៊ីវិលយ់ាងហោចណាស់ ១៣នាក់។ នេះបើយោងតាមអ្នកឃើញហេតុការណ៍ផ្ទាល់ និងប្រព័ន្ធផ្សព្វផ្សាយក្នុងស្រុក។

អ្នកដែលបានឃើញហេតុការណ៍ផ្ទាល់ម្នាក់ បានប្រាប់ថា ការបាញ់កាំភ្លើងធំ និងការទម្លាក់គ្រាប់បែកតាមអាកាស ផ្តោតលើផ្នែកខាងលិចនៃសង្កាត់ Umbada និងមូលដ្ឋានយោធា Karari ដែលគ្រប់គ្រងដោយកងទ័ព នៅភាគខាងជើងតំបន់អូមដឺមែន (Omdurman)។

ប្រទេសស៊ូដង់ បាន និងកំពុងកើតមានការប៉ះទង្គិចគ្នាយ៉ាងខ្លាំងក្លា រវាងកងកម្លាំង SAF និង RSF នៅទីក្រុងខាទូម និងតំបន់ផ្សេងទៀត ចាប់តាំងពីថ្ងៃទី១៥ ខែមេសាមក ដែលបណ្តាលឲ្យមនុស្សយ៉ាងហោចណាស់ ៣.០០០នាក់ បានស្លាប់ និងជាង ៦.០០០នាក់រងរបួស។ នេះបើយោងតាមតួលេខ ដែលចេញផ្សាយ ដោយក្រសួងសុខាភិបាលស៊ូដង់។

យោងតាមរបាយការណ៍ចុងក្រោយរបស់ការិយាល័យអង្គការសហប្រជាជាតិ សម្រាប់ការសម្របសម្រួលកិច្ចការមនុស្សធម៌ (OCHA) បានឲ្យដឹងថា មនុស្សប្រហែល ៥,៣លាននាក់ ត្រូវបានផ្លាស់ប្ដូរទីលំនៅ ទាំងក្នុង និងក្រៅប្រទេសស៊ូដង់ ហើយមនុស្សជាង ១លាននាក់ បានឆ្លងចូលទៅក្នុងប្រទេសជិតខាង ក្នុងនោះរួមទាំងសាធារណរដ្ឋអាហ្វ្រិកកណ្តាល ឆាដ អេហ្ស៊ីប អេត្យូពី និងស៊ូដង់ខាងត្បូង៕